Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Авалхи асаттем телейне шыраса

(Нушаран тен тарса?)

Вăрманти чăтлăха упа евĕр пытаннă.

Ĕмĕрхи юмана тӳнтерсе, çунтарса,

Тунката кăкласа

Çĕн уя ака пуçĕпе шăйăрттарнă.

Ывçăн-ывçăн сапса кунтăкри вăрлăхне

Акнă вăл тыррине.

Киремет варĕнче чӳк туса та хăварнă.

Кĕр çитсен çапнă авăн.

Вара ăшă кун

(Тахçанхи ĕмĕт ун)

Пĕçерсе кăпăшка, сарă çăкăр кăларнă.

«Ыр ут çынна таптамасть,

Ыр çын çынна хурламасть»,

Тенине пĕлет Хумма,

Пурпĕр хурлать хăть кама.

«Çын валли шăтăк ан чав.

Лекĕн, теççĕ, ху унта».

Çакна пĕлнипех Питрав

Çĕр айне чикет Тита.

«Ик мулкача йĕрлекен

Пĕрне те тытайман», тет.

Çакна шеп пĕлсех Евген

Пур ĕçе те кӳлĕнет.

«Ан мухта хăвна, тет Ял,

Мухтаччăр çынсем сана».

Пурпĕрех çӳрет Миххал

Мухтаса хăйне кăна.

«Каймăн ултавпа инçе»

Тенине пĕлсе тăрсах,

Улталать тек Униççе,

Уямасть те намăса.

«Васкакан вакка сикет»

Тенине илтмен-ши Влас?

Пĕрмаях чупса çӳрет,

Такăнса ӳкет час-час.

«Пĕччен йывăç час ӳкет»,

Нил çакна шута илмест.

Пĕчченех ялан çӳрет,

Тус тупмашкăн сĕмленмест.

«Вăрçăсен усси пурах», —

Шурă çурт янтăрашать.

Вăл унта-кунта пушар

Кăлармашкăн тăрăшать.

«Вĕлерсен кахалсене,

Пулĕ, теç, тĕнче ĕçчен».

Тĕп тусан салху çынна,

Иксĕлет иккен кичем.

Чиперех маррисене

Ĕнтмелле вутра-хĕмре.

Пулать-мĕн çапла пур йыш

Хĕрлĕ мăкăнь пек хитре.

«Татăлсан ĕмĕрĕсем

Çĕр çинчи пур ухмахсен,

Пулĕç, теççĕ, ăслăрах

Пур çынсем те çут тĕнчен».

«Йышăнсан çăва-масар

Аптрашки чирлисене,

Пулĕ, теççĕ, Çут тĕнче

Ырă-сывă кулленех».

«Çавăрсан тăшмансене

Хамăр май, тăнăç пулать.

Пĕтĕ, теççĕ, пур усал.

Тухĕ ырă çеç çула».

Философи кунашкал

Алхасни кӳрет тип шар.

Мирлĕ-мирлĕ ĕç кăна

Пире кӳрĕ пархатар!

Эс çитĕн, Çĕршывăм,

Татах çирĕплен;

Çĕнелĕр, ялсем,

Хуласем, — кунсерен.

Ĕçчен çĕнтерӳçĕ

Çĕршывăм-анне,

Эс паттăр пыран

Коммунизм патне.

Çав хĕрпе ăнсăртран эп тĕл пултăм.

Капăр клуб. Çăмăл вальс. Ăсату.

Çĕрĕпех пĕр калаçрăм та култăм,

Е хашлатрăм,

– Эх, юрату…

Сăнĕнче ун вылярĕ çу кунĕ,

Ăшĕнче – хĕл сивви, хулăн пăр.

Мĕншĕн шиклĕ кулли унăн пур,

Мĕншĕн çамрăклăх вучĕ çук унăн?

- Савнă çыннăм çаратрĕ мана.

Çĕрĕпе кулли çеç çумра юлчĕç.

Ан хăтлан ăшăтма ман чуна…

Пуçне пĕкрĕ те хĕр темшĕн кулчĕ.

Эсĕ пирĕн çунат, шухă ĕмĕт кăварĕ,

Çамрăклăх!

Кашни çыннăн телейĕ, юратăвĕ, шарĕ,

Çамрăклăх!

Яланах эс шуйхат чĕрене

Çамрăклăх!

Санпала эпир пурнăç хирне сухалатпăр,

Çамрăклăх!

Хамăр ĕмĕр çинчен биографи çыратпăр,

Çамрăклăх!

Чи таса, вут-кăварлă сăмах –

Çамрăклăх!

«Пурнăç çуккă, теççĕ,

Марс хутлăхĕнче».

Ун пирки вĕçеççĕ

Хыпарсем инçе.

Ĕненместĕп эпĕ

Çакă хыпара.

«Пурнăç пурах, тетĕп,

Шеп планетăра».

Çук нимле сăлтав та

Марса тиркеме.

Пур-çке май унта та

Чĕрлĕх ĕрчеме.

Йывăрланса çитрĕ

Хамăр Çĕр çинче

Кунĕ, каçĕ, ирĕ

Ĕçлекен çынсен.

Халăх хыççăн халăх

Халĕ çакланать

Мăриккан ултавлăн

Янă вăлтана.

Лекĕ ак пире те

Çав синкер шăпа.

СăШăА çӳретĕ

Пире тăлăпа.

Тăвансем, куçар-и

Ырă Марс çине.

Çĕн Раççей уçар-и

Янкисĕррине.

Библире каланă теççĕ:

«Пурнăç Çĕр çинче пĕтет».

Çылăхсемшĕн-элекçĕн

Ун патне пырать этем.

Вăттисем пире чараççĕ

«Çылăха ан кĕр» тесе.

Пурпĕр сĕмсĕрсем тытаççĕ

Мăрчама усал ĕçе.

«Ан вăрла» тесе каланă

Пĕр-пĕрне мĕн авалтан.

Пурпĕрех-çке ал хыпанĕ

Уйрăлмасть хăш ывăлтан.

Эс «суя çур пурнăç» тетĕн,

Улталан кула-кула.

Çавна май тек кĕскететĕн

Çĕр çинчи кунна-çулна.

Асатте ялан калатчĕ:

«Чухăна пулăшмалла».

Пуянсем çакна манаççĕ,

Сĕтĕреç тамăкалла.

Вăйлисем текех хĕсеççĕ

Пур çĕрте вăйсăррине.

Туршăн та, кĕç ӳкереççĕ

Вут ăшне Çĕр чăмăрне.

Тăвансемĕр, ан пулсамăр

Хапсăнчăк мăриккан пек.

Чыслă пулăр, ан кăтартăр

Хамăра нихçан инкек.

Эх, аван-çке çумăр хыççăн

Каç пулса килес чухне,

Янратса ярсассăн уççăн

Шăпчăк савăк юррине,

Кĕрлесе иртсен, мăнаçлă

Аслатийĕ, инçетре,

Мĕн тери чуна хаваслă, —

Мĕн тери çĕршыв хитре!

Кун пек чух епле лăпланăн

Тухмасан шыв хĕррине?

Савăнса тăрса сăнатăн

Аслă Атăл илемне.

Инçех мар, лере, шыв çийĕн

Çăмăл кимĕ ярăнать.

Ун çинчи хĕрсен сассийĕ

Атăл тăрăх ян каять.

Эп алла илсеттĕм купăс

Ĕнересшĕн çав юрра.

Çавăн чух вара ман шухăш

Кĕвĕленчĕ сăвăра.

Пит аван çав çумăр хыççăн

Хĕвел аннă вăхăтра

Илтĕнсен илемлĕн, уççăн

Çĕнĕ юрă таврара.

Çĕрле. Атăл çийĕн

Яш тантăшсемпе

Аван çӳремешкĕн

Пĕрле кимĕпе.

Çӳлтен çутă уйăх

Йăвашшăн пăхать.

Çути ун шыв тăрăх

Чĕркĕмĕл суйлать.

Пыратпăр хăюллăн

Ишсе, малалла.

Çап-çутă йĕр хумлăн

Юлать хыçала.

Умра тĕкĕр евĕр

Шыв çийĕ яка.

Юхать аслă Атăл

Туллин, сарлакан.

Ун мăшăр çыранĕ

Пит капăр, пуян, —

Ем-ешĕл çаранĕ,

Илемлĕ вăрман.

Эх, Атăлăм, Атăл,

Саватăп сана,

Нихçан эс ан татăл, —

Ан сивĕт чуна.