Электронлă вулавăш

Лашам, пулаймарăн çав эс урхамах,

Пуçна каçăртса çӳреймерĕн, лашам,

Каллех ак тиев — хăлтăркка урапах —

Атя, тапаçлан — эп кăштах пулăшам.

 

Мĕн тейĕн, лашам, чăтмалла-тӳсмелле,

Тиев йывăртан эс пуçна çеç ан ус.

Сан ман пурнăçа та кăштах пĕлмелле:

Эс ман яланхи çывăхран-çывăх тус.

 

Эп пур, сан пекех, ик турта хушшинче:

Сурать, тĕлкĕшет кулленех хул пуççи.

Выртман хĕртĕнсе сар хĕвел ăшшинче,

Хура тар тухсан — типĕтет çил уççи.

 

Пире ĕçе кӳлнĕ — эппин туртмалла.

Халь çак сăрт çине хăпарса çитсенех

Эс утă кăшт çи (ман пирус туртмалла),

Вăй кĕрĕ сана çав утта çисенех.

 

Çул-йĕрĕ ытла та тумхахлă вара,

Çырмийĕ-çатрийĕ — ура пуссанах.

Лараççĕ хăшсем паян ăш йăвара, —

Нихçан та ăнланмĕç мана та сана.

 

Пĕрре анмалла тĕпсĕр пек çырмана,

Кайран пашкаса туртмалла тăвалла.

Лашам, каласам, мĕнлерех çырмалла

Ку пурнăç çинчен ман паян сăвăлла?

 

Сăвви тарама-ха, кун-çул урапи

Мĕскершĕн паян хăлтăр-халтăр кусать?

Пĕрре пурнăçра канлĕ кун курăп-и?

Çак шухăш чуна арман чуль пек пусать.

 

Сана хăратман эп, лашам, пушăпа,

Хаяр сăмахпа та вăрçман çул çинче.

Мана леккелет — мĕн тăвас? — ку шăпа —

Эй, мĕн кăна тӳсмĕн кун-çул уйĕнче!

 

Пусартăм кăштах тĕтĕмпе чунăма.

Лашам, тапранар — каç чаршав, ав, çакать...

Кунсем иртнĕçемĕн, çулсем шунă май

Вăй-хал та ейӳ шывĕ евĕр чакать.

 

...Мĕн ĕмĕр, мĕн ĕмĕр турта хушшинче:

Атя, тапаçлан, кулленхи ĕç лаши!

Пĕлетĕп: кайран, ватăлсан, çĕр çинче

Пулатпăр санпа эпирех ытлашши...

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн