Электронлă вулавăш

Вĕр çĕн çулпа мулкач чупать,

Хăй шав калать: «Çĕн çул, Çĕн çул!..

Çĕнни — ман çул, кивви юлать -

Ăна кашнийĕ алă сул!»

Хавас, чăн, пысăк чĕререх

Пĕрне-пĕри телей сунар.

Ку пулĕ, тен, илемлĕрех,

Усаллине тинех манар.

Тăван-пĕтен пур хутшăнма,

Çемье те халсăр мар, сывах.

Пулайтăр сывлăх пурăнма,

Эс те эп пур паян, тавах!

Ырра кĕтетпĕр çĕннинчен —

Темле тăрсан та самана.

Йĕрки ун хăйĕн — çут тĕнчен,

Тем кирлĕ мар сана-мана.

Чунран-вартан çакна калам:

Туссем, ялан пĕрле пулар.

Çĕн çул! Çĕн çул! Пурне — салам!

Эппин юрлар, ташлар, кулар!