Электронлă вулавăш

 

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

 

Аннем чĕри тапать ман кăкăрта,

Тасалăхĕ ун — ăшă кăмăлта,

Эп саврăм унпала этемлĕхе, —

Мухтав сана, анне, ĕмĕрлĕхе!

 

Атте чĕри тапать ман кăкăрта,

Вăл харсăр арăслан та, кăйкăр та,

Вĕрентрĕ вăл мана тĕрĕслĕхе, —

Мухтав сана, атте, ĕмĕрлĕхе!

 

Туссен чĕри тапать ман кăкăрта,

Вăл нихăçан сӳнми шĕл кăвартан,

Ун ăшшинче упрарăм пĕрлĕхе —

Мухтав сана, туссем, ĕмĕрлĕхе!

 

Савни чĕри тапать ман кăкăрта,

Чуна чĕм кĕртекен хевти пуртан

Вăл чĕртрĕ туйăмри хĕрӳлĕхе, —

Мухтав сана, савни ĕмĕрлĕхе!

 

Çĕршыв чĕри тапать ман кăкăрта:

Мĕльюн чĕре, юнташлă йыш пуртан,

Упрать ытарайми ирĕклĕхе, —

Мухтав сана, Çĕршыв, ĕмĕрлĕхе!

 

Пур сивĕнми чĕре ман кăкăрта:

Вăл — халăхăн, хăрми тĕп тымартан

Вăй-хал парать вăл вилĕмсĕрлĕхе...

Тав, халăхăм, сана ĕмĕрлĕхе!

(юрă)

 

Эпĕ çил пулса шаккарăм

Сирĕн кантăкран.

Вĕлтĕртетрĕ шурă карă

Хаш! Сывланăран...

 

Мĕншĕн эсĕ тухса кайнă

Çырлана пĕччен?

Эп çырла пулса ларатăп

Сан çулу çинче.

Сан çулу çинче...

 

Тен, ăна курмасăр пырăн

Çиле хирĕçех.

Питĕ лайăх, питĕ ырă,

Çилĕ вăл — эпех!

Çилĕ вăл эпех...

Утма çулпа каятăп хулана,

Ал çупрĕç лăпкăн çулçăсем çăт-çат.

Пĕр айккинче шур хурăн хумханать,

Тепĕр енче юман тем калаçать.

 

Иртмессерен ик йывăç хушшипе

Вĕсем пире ялан курнаççĕ халь

Нарспипеле Сетнер яланлăха

Пĕрле пулмашкăн хирĕç утнă пек.

Хула универмагĕ çывăхĕнче икĕ тантăш — Çăхан Аннипе Ясмăк Варукĕ тĕл пулчĕç. Анна, пуян ашшĕпе амăшĕн пĕртен-пĕр хĕрĕ, пĕчĕклех мăн кăмăллăччĕ, хăйне ыттисенчен çӳллĕрех те мăнаçлăрах тытатчĕ. Вăтам шкулта вĕреннĕ чухне вара модăна хăвалама пуçларĕ. Шукăль тумланса çӳрекенскерĕн икĕ аллинче те пĕрер кĕмĕл çĕрĕ, хăлха çунаттисенче — кăваррăн хĕмленекен хаклă йышши алка, мăйĕнче — чĕре евĕрлĕ ылтăн кулон... Халĕ те хăнăхнă йăлине пăрахайман пулас ав, йăлкăшса-çиçкĕнсе кăна тăрать саççим.

— О, Варя! — терĕ вăл тантăшне ыталаса. — Курманни çĕр çул! Ну, каласа пар: мĕнле пурăнатăн, ăçта çĕмĕрттеретĕн?

— Пурăнкалап хуллен-майĕпен, — сăпайлăн тавăрчĕ лешĕ.

— Пирĕн вăхăтра хуллен пурăнма юрамасть, Варя, — иртен-çӳренсене хăйсем çине пăхтарса кĕрлерĕ Анна. — Çĕр çĕмĕрмелле!

— Э, ăçта унта унашкалах алхасма...

— А ма? «Эмансипаци» текеннине ахаль туса панă-им пире? Асту, хальхи вăхăтра хуçалăх тилхепине эпир, хĕрарăмсем, тытатпăр: ача çурататпăр, космоса вĕçетпĕр, пуçлăх тенкелĕ çинче саркаланса ларатпăр.

— Хăвăн пĕчĕккисем миçе сан, Анна? Ятранах чĕннĕшĕн каçар мана, сахал вĕреннĕ хĕрарăма.

Малалла

Çуркунне, шыв-шур кайсассăн,

Çутçанталăк çĕнелсен,

Çĕр сывла пуçлать хаваслăн

Вăй илсе сар хĕвелтен.

 

Çĕр сывлать. Çӳлте шăваççĕ

Çивитти пек пĕлĕтсем,

Анлă уй-хирсем выртаççĕ

Вăрлăх акасса кĕтсе.

 

Кăпăшка тăпра килентĕр,

Ăшă çумăр, хатĕр пул!

Çĕр-аннемĕр çитĕнтертĕр

Пысăк тухăçлă тыр-пул.

 

— Çĕр сывлать! — тесе калатчĕ

Çуркунне çитсен атте,

Çиессӳ килсен кулачă

Упрасам çĕр хăватне.

Ирхи сывлăм ырă, уçă,

Ыталас килет çĕре.

Пит хавассăн та, пит уççăн

Савăнать хастар чĕре.

 

Лăпкă çилĕ кассăн-кассăн

Вăшăрхать кăнтăр енчен.

Ирлеле тухса пăхсассăн,

Пĕлĕт шăлтах — кĕленче.

 

Паян ир хире васкарăм,

Чĕрем туртăнчĕ унта.

Ах, епле пурте хастаррăн

Тăрăшсах ĕçлет кунта.

 

Бригадир — Курак Шарушкин,

Тухнă пуринчен малтан.

Ак, курап, тата пĕр ушкăн

Васкаса килеç ялтан.

 

Вуник касă акаканĕ

Га çине ӳкнĕ тӳрем.

Вăхăтсăр ларса кам канĕ,

Кам пăрăнĕ çак ĕçрен?..

 

Кĕрлесех шавларĕ трактор,

Колхозниксемпе пĕрлех.

Уй илемĕ — хурçă паттăр —

Ун илемĕ — ĕмĕрех!

 

Ăмăртса ĕçлет бригада

Колхозла çуракинче.

Рапорт çитĕ Мускава:

«Çĕнтерӳ — ир акнинче!»

(Уçă çыру)

 

Итле, Стихванăм,

Итлесем, юлташăм,

Саниала

Бараев калаçать.

Çулсăр пырсан,

Чăнах та юр ашăн,

Сырнă ура та

Салтăнать.

Эс лайăх пĕлетĕн,

Эп хам та аташрăм,

Сăвăсем тăкăнмаççĕ

Маччаран.

Эпир пурнăçра

Кашниех аваншăн,

Никам та ырламасть

Начара.

Анчах, тепĕр чух,

Ытлах ашкăнатпăр:

«Чаплă ят»

Чĕрене кăтăклать.

«Пĕтĕм тĕнчипех»

Сиксе кăшкăратпăр, —

Виç-таватă «орден»

Кăкăра çутатать.

«Чĕрере градуссем

Виçшер пин çуллăх»,

«Канатран та хулăн

Юн тымарĕ». —

Çаксене кăмăлпа

Кам савса вулĕ,

Кам чĕри хаваспа

Вырăн парĕ?!.

Уссăр фантазин

Хăмпи карăнать те,

Палăк лартнăнах

Туйăнать!

Ят хыççăн хушатпăр:

«Хисеплĕ редактор!

Çакна

Талант

Çырать».

. . . . . . . . . . . . . . . . . .

 

...Çапла эпĕ хам

Хăлаçланнă...

(Сăрара пулсан,

Малалла

Юратрăм пуль çав

Ыраш пуссине.

Курассăм килет

Хăватлă хумне.

 

Савни те санпах

Вырать юнашар,

Кĕлти те танах,

Манни пек капмар.

 

Сар çу пек хĕвел

Хĕртет те хĕртет,

Кĕрет вăл хĕве,

Хулран чĕпĕтет.

 

Çиçтĕр çурла,

Килтĕр савнăç!

Кун — каçалла,

Авă, ана вĕç!

 

Анюк кĕлтине

Тăпăл çыхать,

Куçĕ мана

Темĕн калать.

 

Юратрăм пуль çав

Ыраш пуссине.

Путассăм килет

Хаваслă хумне.

Владимир Васильевич Бараев-Сĕркке тăван литературăра вунă çул анчах ĕçлесе ĕлкĕрчĕ, вăтăр иккĕре вăл Сталинградшăн пынă хаяр çапăçура пуçне хучĕ. Сахал пурăннă пулин те, пултарулăх çунатне талант пӳрнĕ таранах карса ĕлкĕреймерĕ пулин те, поэт чăваш поэзийĕнче хăйне уйрăм йĕр, тарăн касă хăварчĕ. Ку кĕнекене эпир, поэт хăй хушса хăварнă тăрăх, унăн суйласа илнĕ япалисене кĕртрĕмĕр, чылайăшĕ халиччен пĕртте пичетленмен, çырасса та вĕсене е окопра е вăрçă пуçланас умĕнхи çулсенче çырнă.

...Çирĕммĕш çулсен вĕçĕпе вăтăрмĕш çулсен пуçламăшĕнче Вăтам Атăл крайĕн тĕп хулинче Самарта чăваш писателĕсен пĕр ушкăнĕ чăмăртанма тытăнчĕ: Мускавран Исаев Мĕтри, Пăсăлăкран Влас Паймен, Шупашкартан Илле Тукташ, Нестĕр Янкас, Ульяновскинчен Владимир Бараев, Пĕкĕлме таврашĕнчен Хветĕр Уяр килчĕç. Самарта «Колхозник» ятлă чăваш хаçачĕ, чăваш кĕнекисем, альманахĕсем тухма тытăнчĕç, крайри вак халăхсен клубĕнче чăваш спектаклĕсене лартма пуçларĕç, чăваш юрри-ташши илтĕнсе кайрĕ. Çав клубрах эпир чăвашла кинокартинăсем малтанхи хут курма тытăнтăмăр. Кунсăр пуçне хулана час-часах çамрăк Хусанкайпа Ухсай Яккăвĕ пырса каятчĕç. Самарта пурăнакан чăвашсен культурăллă пурнăçĕ вĕресе тăма тытăнчĕ.

Малалла

Тиркени пулать-и тиркешни?

Кĕрешни те мар вăл, тĕркешни, —

Ахальтен кăна ятне туни

Халь кама-ши кирлĕ? Ял кулли.

 

Тиркесессĕн — кирлипе тирке,

Кĕрешсессĕн, пултăрччĕ йĕрке:

Сăмаха пустуй кăна çапсан,

Пурнăç хăвăрт ăнасса ан шан.

 

Кĕрешен тĕк, тăрăшса кĕреш,

Тĕлсĕр чух çĕнме те хĕнтерех,

Чăнлăхшăн вута, шыва кĕр эс,

Унсăрăн мĕнле-ха çĕнтерес?

 

Чăнлăха шыран тăк — ан хăра,

Чăнлăха памаççĕ халсăра.

Чăтăмлăх туптантăр чăнлăхра,

Чăтăмлăх хăвачĕ — халăхра.