Электронлă вулавăш

Мăн хырăмлă, мăнтăр,

Хаваслă та ӳсĕр,

Ялан çухрашать.

Тарçăн тăварлă тарĕ

Çак пурнăçа ăна панă;

Ку вăл — пуян.

Вĕçсĕр тар тăкнипе

Типсе хăрнă,

Сăнĕ те çук.

Выçă, çĕтĕк тумтирĕ,

Тертлĕ, асапла;

Ку вăл — чухăн.

Анаталла-тăвалла,

Пирĕн ăçта каймалла.

Çитмен пурнăçран тарма,

Çăкăр чĕлли шырама.

Каяс пулсан тăвалла,

Лашана тăвармалла:

Пирĕн лаша пит ырхан,

Çиттĕр пуяна ылхан.

Лашана тăвармалла,

Каяймасть вăл тăвалла.

Мăшкăллать пире пуян,

Уншăн савăнăç паян.

Лашана шеллемелле,

Хамăрăн кӳлĕнмелле.

Пуян каять сиккипе,

Эпĕ утап пĕкĕпе.

Чухăн çыннăн пурлăх çук,

Пуян çыннăн ырлăх çук.

Çиес килет — çăкăр çук,

Укçа-тенкĕ тупма çук.

Урапана тăвалла

Туртса хамăн каймалла.

Шеллемелле лашана

Ярăнтарса нушана.

Анаталла-тăвалла,

Пуян кайрĕ тăвалла.

Пултăр тамăк ун валли,

Çăлăнăç — пире валли.

23.09.2007.