Электронлă вулавăш

Пысăк-пысăк Вăрманта

Ларать пĕчĕк Тунката.

— Халĕ çеç эпĕ лутра...

Ĕлĕк пулнăччĕ кăтра,

Ешĕл те кервен¹ Юман!..

Иртекен манран пулман!..

Тăр! чĕтретчĕ çак Ката!..

Сас каятчĕ çич юта!..

Хăçан папка çурмалла,

Хăçан çулçă тăкмалла —

Эп параттăмччĕ хушу.

Çырмара юхан шыв-шур

Шăпланатчĕ çавăн чух.

Пулнă вăйлă! Пулнă шух!

Ун пекки халь, кай-ха, туп!..

— Чарăн-ха, пустуй ан суп:

Вуллуна тивсессĕн Хурт

Кунтан пулмĕ чаплă çурт

Кунтан тухмĕ пĕрене,

Терĕç мар-и, Вĕрене?

Касрĕç ячĕç, турĕç вут.

Суййуна текех ан сут, —

Терĕ чăрăш юнаса.

Çухатман хальччен ăса:

Ни çулла, ни çуркунне,

Ни хĕлле, ни кĕркунне

Улшăнмасăр вăл тăрать,

Йышăнмасть нихçан хахать².

Ĕлĕк пулнă Вĕрене

Çав тери йӳтенине

Хăнăхса çитсе Юман,

Хурăнпа Пилеш, Палан.

Мĕн тăвас? Нумай юлман —

Курмăша перет Вăрман.

Çапла халь те вăрманта.

Çĕрсе ларать Тунката.

— Йывăç, мĕншĕн эс кашлатăн,

Ма шавлатăн-ха сĕре?

Акă, эп шăпах ларатăп, —

Тенĕ Тунката пĕрре.

Вăл каппайнă куç кĕреттĕн

Мухтаса шăпăртлăхне.

— Чĕмсĕррӳпелех пĕтетĕн, —

Йывăç сулнă туратне.