Хапăлласа кĕтсе илетпĕр

 

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

 

Кĕнекесем

ИлемÇамрăк ĕмĕтÇут пайăркаӖмӗр вӗренХĕн-хур айĕнчеВăхăт таппиЫтла та хитреччĕ ун чух çуркунне

Япалан йĕрки пур


Славăпа Андрей пӳрте кĕрсенех тĕрткелешме тытăнчĕç. Амăшĕ темиçе хут асăрхаттарса каласан та илтмĕш пулчĕç.

Сасартăк Андрей пуçĕпе сĕтел кĕтессине пырса çапăнчĕ. Юн юхма тапратрĕ. Айтуру! Чарма та çук. Киле «васкавлă пулăшу» машинине шăнкăравласа чĕнмелле пулчĕ.

Вăйăран вăкăр тухать тенĕ çав ваттисем.

Путексем


Халĕ пирĕн выльăхсем

Хăрамаççĕ сивĕрен.

Вăрăм çăмлă сурăхсем

Ним шăнмаççĕ витере.

 

Мăтăр-мăтăр сурăхсем,

Мунча тулли путексем.

Чăлттик-чалтти! урайĕнче

Сиккелеççĕ ир çинче.

 

Эх, ташлассăмах килет

Вĕсемпе ман мунчара.

Ыталатăп путеке,

Ачашлатăп, юратап.

Хĕл умĕн


Йĕпкĕн шурă çăнăх пек

Лăпсăр-лăпсăр юр çăвать.

Ав çанталăк сивĕтет,

Ерипенех хĕл ларать.

 

Çук, кĕтменччĕ хĕллене,

Килетех тем пурпĕрех.

Выльăх-чĕрлĕх картана

Кĕрсе тăчĕ ăшăнма.

 

Сăхмансем те алсишсем

Хатĕрлеççĕ аннесем.

Эпир, çамрăк ачасем,

Хатĕрлетпĕр конькисем.

 

Хатĕрлетпĕр конькисем,

Хатĕрлетпĕр йĕлтĕрсем.

Кĕç тытатпăр кĕнеке —

Пикенетпĕр вĕренме.

 

Ыр кĕççе пек çеремсем

Купалатпăр пӳрт тавра.

Ăшă пултăрччĕ тесе

Шухăшлатпăр хамăра.

 

Сыснасен те çурисем

Нăриклетрĕç ир-ирех.

Йăткалаççĕ улăмсем

Хăтăласшăн сивĕрен.

Пĕчĕк тусăмсем


Садри чăрăш çине çакрăм

Капăрлатнă сырăша.

Унта тулă кĕрпи сапрăм

Пуринчен те ир тăрса.

 

Чăкăтне те шеллемерĕм,

Чылай хутăм вакласа.

— Тусăмсемĕр, килĕр, — терĕм, —

Хăналанăр савăнса.

 

Вĕлтĕр-вĕлтĕр вĕçсе килчĕç

Çерçисем те уйăпсем.

Апат-çимĕçпе киленчĕç

Çепĕç чунлă тусăмсем.

Манаймăп


Нихăçан та сана эп манаймăп,

Сан пекки нихăçан та тупаймăп.

Чунăмра пысăк тунсăх пулсан та

Сан патна нихăçан таврăнаймăп.

 

Сывлăм тăрăх санпа эп утаймăп,

Кашни ир шурăмпуç тĕл пулаймăп.

Тем пекех курас килчĕ пулсан та

Сан патна çĕнĕ çул эп хываймăп.

 

Юратун çунса кайрĕ кĕперĕ:

Уйрăлу пит нумай-çке кĕтмерĕ!

Пĕр-пĕрне сăмах панă пулсан та

Çын сăмахĕ пире шеллемерĕ.

 

Чунсене хытă чул-çке пусарчĕ,

Çичĕ ют калаçни йĕр хăварчĕ.

Куççульпех халь ларса макăрсан та

Юратун тек тивеймĕ кăвайчĕ.

 

Нихăçан та сана эп манаймăп,

Сан пекки нихăçан та тупаймăп.

Чунăмра пысăк тунсăх пулсан та

Сан патна нихăçан таврăнаймăп.

Пĕр тенкĕ


Ялта ĕççи пуçланайман-ха, халăх ытларах килте. Кашни хăй ĕçĕпе тăрмашать, ĕçкĕ ĕçекен те пур. Кульккасем паян çĕнĕ пӳрт ĕçки ирттереççĕ. Ку уява кĕркунне тăваканччĕ, анчах çителĕклĕ пурнăçпа пурăнатăн пулсан, мĕн кĕтмелли? Сăра вĕретме авăртса хунă салачĕ пур. Эрех сыпсан çырткалама пахча тулли тĕрлĕ çимĕç. Ĕçкĕ ятнех така та пусрĕç.

Çурчĕ те Кульккан яла тĕлĕнтермелĕх пур çав. Картина çинчи пек илемлĕ вăл: шап-шурă сăрланă, урамалла тăватă чӳрече. Тултан çеç мар, шалтан та чăн-чăн кермен: стенисене те, маччине те гипсран тунă, эреш-мерешпе илемлетнĕ.

Кулькка лутакарах та сарлака, вăтăр çулсенчен иртнĕ арçын. Шап-шурă нейлон кĕпине хуп-хура брюки ăшне чикнĕ. Уринче шĕп-шĕвĕр вĕçлĕ модăллă туфли.

Паян вăл самаях пăлханать. Урамра машина сасси илтĕнмессерен урама чупа-чупа тухать, кашни килекенех хапха умĕнче сăра курки тыттарать.

Паян Кулькка патне питĕ хаклă хăна килмелле-ха, ăна кĕтсе вăл час-час шоссе хĕрринчи урамалла пăхкалать, анчах машинăсем чарăнмаççĕ, вăш та вăш ирте-ирте каяççĕ.

Ялти хăнасем çаплах килеççĕ: мăшăрăн та, пĕрерĕн те. Килекен хăнасен аллинче парнесем. Акă Микихвер мучи те çитрĕ. Ярмарккăна каять тейĕн старике: хура костюмпа, тĕрĕллĕ кĕпепе. Уявсенче кăна тăхăнакан сăран аттине çап-çутă пуличчен тасатнă. Хул айне кĕпе çумалли цинк валашка хĕстернĕ. Курччăр çынсем: мучин те парне япăх мар.

Малалла

Арăма


Пит çинчи пĕрремĕш пĕркеленчĕк

Сан сăнна кăшт ватăлăх кӳрсен,

Куçусем татах та илемленчĕç —

Хитререх чи капăр куçсенчен.

 

Заводран каç кӳлĕм таврăнсассăн,

Эс килте те лартăн ĕç тытса.

Туйăнмасть пĕрре те ывăнассăн,

Сан аллу пырать ăсталанса.

 

Хĕрпе каччă чухнехи айванлăх

Халь йăлтах тасалчĕ пирĕнтен.

Çĕр çинче эпир те ăс пухмалăх

Пурăннă, юлман пуль çынсенчен?

 

Хуть мĕнле пулсан та, халĕ маншăн

Пурнăç темшĕн тин çеç пуçланать.

Кулянмастăп çирĕмре пулманшăн,

Вăтăрта та вăй çунат хушать.

Мăшăрăма


Ирсерен эс мана ăсататăн

Ăш самах каласа, ыр сунса.

Чӳрече умĕнчех-çке тăратăн

Эп куçран кайиччен ал сулса.

 

Кунĕпех ман çинчен шухăшлатăн

Чиперех килессе ĕненсе.

Шăнкăрав ямасан — кулянатăн

Чунупа-чĕрӳпе тем сиссе...

 

Каçсерен урама эс тухатăн

Эп ĕçрен килнĕ чух тĕл пулма.

Йăл купса аллăмран-çке тытатăн

Юнашар кил енне çул тытма.

 

Пирĕшти пек мана эс упратăн

Çăмăл мар кăмăла ăнланса.

Йăнăшсем тăвасран та сыхлатăн

Тĕрĕс çул кăтартса, юратса!

 

Чунтанах эп сана юрататăп.

Саншăнах тав тăвап Туррине!

Саншăнах çĕр çинче пурăнатăп

Упраса чун-чĕре ăшшине!

Курас терĕм акăш ишнине


Юри антăм кӳлĕ хĕррине:

Курас терĕм хум вылянине,

Сăнас терĕм акăш ишнине,

Чарас терĕм чун ыратнине!

 

Куртăм мăшăр акăш ишнине,

Çунатпа пĕр-пĕрне витнине.

Аса илтĕм чунăм савнине,

Хурланса унпа уйрăлнине!

 

Чĕркуçлентĕм сивĕ çĕр çине,

Чараймарăм вĕри куççульне...

Юраймарăм тусăм чĕрине.

Вăл савать паян урăххине!

 

Юри антăм кӳлĕ хĕррине:

Курас терĕм акăш ишнине...

Куртăм мăшăр акăш ишнине,

Чараймарăм чун ыратнине!

Кичем-çке сансăр


Кичем-çке сансăр, савнă тусăм!

Çулăмсăрах чĕрем çунать.

Куççульпеле тулать-çке куçам...

Хăçан-ши тĕлпулу пулать?

 

Ирпе тăрсан та, каç выртсан та

Сăну сан ман умрах тăрать.

Кирек ăçта, кампа пулсан та

Ман чунăм саншăн тунсăхлать.

 

Хĕвел шевли пите лексен те

Сан çепĕç аллуна туяп.

Сар кайăк юррине илтсен те

Сăпайлă куллуна курап!

 

Кичем-çке сансăр, савнă тусăм...

Чĕреçĕм пĕр санах шырать!

Куççулĕнчен типет-ха куçăм...

Шанатăп, тĕл пулу — пулать!

■ Страницăсем: 1 2 3 4 5 6 7 8 ... 766