Купӑста


Эпир урокра «Татăксене» мĕнле çырмаллине вĕрентĕмĕр.

— «Татăксене» урăх нихçан та пĕрле çырмастпăр. Кирек мĕнле диктант парсан та, пурпĕр йăнăш тумастпăр, — терĕмĕр урок вĕçĕнче, учителе шантарса.

— Диктантсенче çеç мар, пурнăçра та кирлĕ вăл, — тет пире учитель.

Эпĕ, тĕлĕннипе, куçа чарсах пăрахрăм: мĕн тума кирлĕ-тĕр пурнăçра çав ăпăр-тапăр «татăксене» вĕренни? Ну, шкул вăл, мĕнле каласан та, шкулах ĕнтĕ, унта темĕн те шухăшласа кăлараççĕ. Темех ĕнтĕ ку — татăк? Ăна хăть пĕрле çыр, хăть уйрăм — вĕреннĕ çын хăех ăнланать. Халĕ тата пирĕн çĕршывра хут пĕлмен çын та çук.

Урокра мĕн вĕреннине шкул хапхинчен тухсанах манса кайрăм. Люся йăмăкăм чăваш чĕлхипе интересленекенсен кружокне юлчĕ, эпĕ часрах киле чупрăм: анне паян тутлă кукăльсем пĕçерет.

Эпĕ сĕтел хушшине кĕрсе лартăм та çыранçи тăватăп, хам çамка айĕн анне пĕçерекен çуллă кукăльсем çине ăмсанса пăхатăп. Кукăльсенчен тутлă шăршă сарăлать, сăмсана кăтăклать.

— Эсĕ мĕн тутуна çуласа ларатăн? — тет анне. — Куккусене хăнана килме çырса пĕлтер-ха. Пĕтĕм халăх Май уявне уявлать. Пирĕн те уявлас.

— Куккасем патне-и? Халех! — терĕм те, хутпа кăранташ кăларса, çырма пуçларăм. Анне каласа пырать, эпĕ çыратăп:

«Кукка! Майăн пĕрремĕшĕнче уява килĕр...»

— Чим-ха, — терĕ анне, — вĕсен купăсĕ лайăх. Ăна та илсе килччĕр. Çыр.

Эпĕ каллех çыратăп. Хам çичĕ пĕлĕтрен çӳле çĕкленнĕ пекех савăннă: ну, тетĕп, купăс каласа куратăп!

Пĕр эрне хушши ыйхă та килмерĕ, апат та анми пулчĕ. Уроксем пирки асăнмалли те çук: вĕсене эпĕ йăмăк тетрадĕнчен вăрттăн çыра-çыра илетĕп.

Кĕтнĕ кун çапах çитрĕ. Иртен пуçласа кăнтăрлаччен сарай тăрринчен анмарăм: кунтан куккаçен ялĕ аван курăнать. Унтан çăмăл машина тухтăр çеç — кукка пулать! Вăл кăçал «Москвич» туяннă. Эпĕ ларса та курнă.

— Тӳ-ӳ-ӳ! — янăраса кайрĕ çурăм хыçĕнчех. Çаврăнса пăхрăм та тĕлĕнсех кайрăм: куккасем пирĕн хапха умне çитсе тăнă-мĕн. Тепĕр çулпа килнĕ пулмалла...

— Кук-ка! — кăшкăрса ятăм эпĕ. — Кук-ка!..

Тӳрех машина патне виркĕнтĕм. Аннепе йăмăкăм та пӳртрен чупса тухрĕç. Аппа машинăран темĕнле çыхăсем кăларчĕ: кучченеçсем пулмалла. Эпĕ купăс кăларасса кĕтетĕп, анчах кукка купăс çинчен аса та илмест, пĕрмай аннепе калаçать.

— Купăс илсе килме ыйтнăччĕ, манса кайрăр пулĕ? — пăшăрханнă пек ыйтрĕ анне.

Кукка сăнĕ сасартăк улшăнчĕ.

— Епле купăс? Купăс çинчен асăнман-çке? Пĕр чĕрес купăста илсе килтĕмĕр...

— Эсир ан кулăр-ха, — тет анне ăнланаймасăр, унтан мана çанăран туртса илчĕ те: — Эсĕ, шĕвĕр, мĕншĕн çырмарăн-ха апла? — тет.

— Эпĕ... эпĕ çырнăччĕ...

Кукка эпĕ çырнă çырăва кăларса кăтартрĕ. Пурте вуларăмăр ăна: «Кукка! Майăн пĕрремĕшĕнче уява килĕр. Килнĕ чухне купăста илсе килĕр. Коля».

— Эх, эсĕ, грамотей! Авă мĕн шухăшласа кăларнă! Тăватă çул вĕрентĕн, япала ячĕсенчен «татăксене» уйрăм çырма пĕлместĕн!.. Халь купăс ăçтан тупăпăр-ха?! — тет анне.

Люся кулать:

— Урокра чанасем нумайрах ӳкерсе лар. Киле панă ĕçсене манран çыра-çыра ил, вара пуçу купăста пуçĕ пек пуласса кĕтсех тăр! — тет.

— Вĕренни сывлăш пекех кирлĕ, — терĕ кукка та.

Вулавçăсен шухăшĕ Вулавçăсен шухăшĕ


Галина Зотова (2021-06-07 08:01:17):

Кун пек кулăшла самантсемпе шкул ачисем час-часах култаратчĕç, шел, хăй вăхăтĕнче ытлашши нумай çырса хуман.

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

Галина Зотова (2021-07-03 15:31:08):

Ку тата мĕнле япала? Сайт ертӳçине ку комментарине хупса хума ыйтатăп. Английский пĕлетĕп тесе мухтанать-им? Секс çав териех кирлĕ-им?

 

Admin (2021-07-19 17:49:42):

Спам вăл. Вăхăтран-вăхăта тасатап вĕсене.

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: