Сывпуллашу ташши


1

Кĕркуннен салхуллă кунĕ.

Пӳрт умне сар çулçă çунă.

Хускалмасăр, шарламасăр,

Тăп выртаççĕ çулçăсем.

Çут çанталăкăн саккунĕ:

Йывăç-курăкĕ, чĕр чунĕ

Ĕмĕрĕн вĕçне тухмасăр

Пурăнманччĕ халиччен.

 

Эпĕр те вĕçне çитетпĕр,

Эпĕр те çĕре кĕретпĕр.

«Сывă пул» темешкĕн йывăр, —

Пур пĕрех калас пулать.

Çакă сарă çулçă евĕр,

Çут çанталăкра çĕтетпĕр,

Чĕрĕ пурнăç — чĕрĕ йывăç

Пирĕнтен ларса юлать.

 

Хальлĕхе çумасть-ха çумăр.

Пӳрт умне сар çулçă çунă.

Хускалмасăр, шарламасăр,

Тăп выртатчĕç çулçăсем.

Килчĕ уçă сывлăш хумĕ,

Çавра çил пек сывлăш хумĕ,

Çулçăсем çĕкленчĕç харсăр,

Тухрĕç аслă çул çине.

 

Тытăнайрĕç алла-аллăн

Пĕр турат çинчи пек, калăн,

Юлашки ташша ташлаççĕ

Сăвă-юрă каласа:

«Шăнкăр-шăнкăр шыв юхать те,

Шăнкăр-шăнкăр шыв юхать,

Шыв юхать те, шыв юхать те,

Шыв юхать те чул юлать».

 

Макăрмарĕç урăм-сурăм.

Те чăн куртăм, те астурăм, —

Кайрĕç.

Курăнми пулсан та,

Тăтăм шухăша путса.

Хăлхара çаплах çав юрă,

Асатте юрланă юрă:

«Ĕмĕр иртет, ĕмĕр иртет,

Ĕмĕр иртет, кун юлать».

 

2

Ачан — ачалла ĕмĕт-шухăш.

Пухса юлашки укçана,

Атте илсе пачĕ хут купăс

Хавас кĕвĕсем калама.

 

Часах эп вĕрентĕм, ӳркевсĕр,

Чăваш кĕввине ӳкнĕрен,

Хут купăс тесе ан тиркешĕр —

Калаттăм чунтан-чĕререн.

 

Асамлă сассем килĕшӳллĕн

Юхса пынăçемĕн çемме,

Лутра кив мачча та пит çӳллĕн

Мана туиăнатчĕ темме.

 

Ачалăхăм! Эс — юрă мар-и?

Санран чаплă юрă, тен, çук...

Пĕр хушă хут купăс тытмарăм.

Анне чирлесеччĕ ун чух.

 

Тăван-пĕлĕшсем пухăнсассăн,

Сăнран улшăнайнă анне

Нӳхреп сăрине кăлармашкăн

Хистерĕ вара аттене.

 

Анне сассине паллаймарăм,

Каларĕ аран илтмелле: —

Эп пурăннă чух ташлаймарăм,

Ан чарăр, ташлассăм килет.

 

Хут купăс тыттарчĕç. Аннеçĕм!

Ак тухрăн хуллен ташлама.

Епле вăй-хăват çитерем-ши

Эп сан çеммӳне калама?

 

Ташларăн, аннеçĕм, пĕр çаврăм

Сăпайлă чăваш ташшине.

Тек нимĕн те эпĕ туймарăм,

Йăлтах эп ăнлантăм, анне.

 

Паян та санран вĕренетĕп

Таса чун-чĕреллĕ пулма.

Кайран çитересчĕ вăй тетĕп

Сан пек

Ташласа уйрăлма.

Вулавçăсен шухăшĕ Вулавçăсен шухăшĕ


Галина (2020-04-22 09:45:35):

Сăвă чĕрене хускатса куçран куççуль кăларчĕ. Тавтапуç!

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: