Юратăвах пулман юрату

Чĕрĕк ĕмĕр пурăнтăмăр ĕнтĕ,

Çемьере ик ывăл та пĕр хĕр.

Çын çинче çын пултăмăр пулсан та

Темшĕн иртерех пуçланчĕ кĕр.

Вăхăтсăр шуратрĕ пуçсене.

Чире куçнă вăхăт — ырату,

Сăлтавсăрах хуçрĕ атьсене.

Юратăвах пулман юрату

Çурмалла çурăлнă савăт пек.

Саншăн, маншăн пысăк çухату.

Пысăках-ши? Калаçмăпăр тек…

Айăпне писменпеле виçеймĕн,

Эп те, эс те çакна туйман мар.

Йывăр, хуçăлнă кĕсмен лексессĕн

Тинĕсре ишмешкĕн юнашар.

Ачасем ӳссен ăнланса илĕç,

Эпир вĕсенне яман ятне.

Ним пулман пекех хăнана килĕç

Ют килти ашшĕ-амăш патне.

2004 çулхи çĕртме уйăхĕ.

Çĕнĕ комментари хуш