Пӳлĕмрен тух


Тӳпери сар хĕвел йăпанса,

Çĕр çине ăш куçпа пăхнă чух,

Ниепле пӳлĕмре хупăнса

Сăввăма вĕçлеме вăйăм çук.

 

Пӱлĕмрен сулхăна, уç çĕре

Ват йăмра таврашне тухса лар.

Ун чухне тепĕр хут эс Кĕрле,

Хĕмленен сăввуна çулăм пар.

 

Сан çумран, йăпанса сарă хĕр

Уттарайĕ колхоз уй-хирне.

Ун чухне эсĕ те сиксе тăр,

Çĕнĕ пурнăç юрри хатĕрле.

 

Ват йăмра айĕнчен тăрса ут

Хумханан сарă тырă хирне,

Сар хĕрсем хушшинче вырăн туп,

Кĕлтине çыхса пар пĕр хĕрне.

 

Сан çумрах чун савни Кĕтерни

Шăрантарĕ илемлĕ юрра.

Колхоз йышĕ ĕçре ĕлкĕрни

Паллă пулĕ пире вăл ыран.

 

Тӳперен сар хĕвел йăпанса,

Çĕр çине ăш куçпа пăхнă чух,

Ниепле пӳлĕмре хупăнса

Сăввăма вĕçлеме вăйăм çук.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: