«Пур иккен çавăн евĕр сăваплă Чару...»


О.Д.

 

Пур иккен çавăн евĕр сăваплă Чару:

сăмахпа та кĕме юрамасть-тĕр

Сан черчен те тулли яшлăхна;

сăнарна çеç йĕрлем эпĕ хур тĕкĕпе.

Илтĕнет, хум сасси пек, гекзаметр...

Чĕнет пек такам — Вăхăт çитрĕ.

Эс — Мастер. —

Ку вăл — Гете сасси пек!

Ку — унăн пил евĕр Элегийĕнчи1 сасă пек.

Çак тӳлек хут енре

ăсăмри анлăшне халь сарать манăн

Марненбадăм,

Анчах — пур-ха элчелĕн умри паллисем! —

Эс пур чух пулас çук уйрăлу, —

Сан таса сăнарна çуратса

тĕлĕнен куçсене шартĕ манăн хăватăм,

Ман ăс-хал çӳллĕшне мраморла ялтратса

эпĕ калăп: вăл — сан хавалу.

Халлĕхе — эпĕ сан Çутуна

ĕмĕр пулнă Илемĕн чĕр тытăмĕ тем-и, —

Ман чĕре тĕшшинчен пуçласа

ункăн-ункăн сарăть çутине вăл паян;

Унăн хăш-пĕр йĕрне

çич çĕр çул каяллах çӳл тивлетлĕ Тоскана

этемĕ

Терцинра ылтăнланă хăй генийĕпе

Аттелле-Емпӳлле ăс-халран.

Вĕçсĕр Çăлтăрлăх пек — çав йĕрсен

паллисем, —

тупсăмне, лăпкă ăрăмçă пек, шырамалăх!

Яшлăх вĕçсĕрлĕхне, хум яран çăлтăр пек,

шав чĕртен эсĕ çав Çутăра;

Вăл çеç мар-çке унта, —

ах, ачалăх та пур, унта пур — тин çуралнă

хĕр-арлăх, —

Халăхун тĕксĕм ылтăн юнне

янратать çав артак — ачалла сасăра!..

 
1 Кунта Гетен юлашки паллă ăстăвăмĕ, «Марнекбад элегийĕ», пирки каланă.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: