Электронлă вулавăш

3.С.Антоновăна

Мĕн пулчĕ, мĕн килсе капланчĕ —

Сывпуллашу-и, паллашу-и?

Тен, яшлăх çĕнĕрен пуçланчĕ,

Тен, çитрĕ ватлăх туйĕ-çуйĕ?

Сăмах вĕçне тухма пĕлмесĕр,

Курсассăн калаçас тесе-и,

Савса пăхса, куçа илмесĕр,

Тĕллентĕмĕр: — Тăван, эсех-и?

Яш чух мăнаçлăх хамăр пекчĕ

Пурахчĕ кăшт илемлĕ пит те.

Мĕн пек, мĕн пек ун чух чиперччĕ,

Айван пулсан та — чыслă питĕ.

Сăпайлăх халь те хамăрпах-тăр,

Чунсемĕн пур-ха ăраскалĕ.

Ытти-хыттишĕн тур çырлахтăр,

Алрах пулсам, телей мăскалĕ.

Мĕскер пире çунатлантарчĕ,

Чун ватăлмасăр хĕвĕшни-и?

Пире татах пĕрле лартсамччĕ,

Ватлăх кунри яш пирĕштийĕм!

1994, нарăс, 5.

Самар-Шупашкар.

Чăваш учителĕсен конференцийĕ.