Мартри сăвă


Учительсене халаллатăп

 

1

Мартри хĕвеллĕ ир — куçра.

Шкула эс паянхи куна та

хальчченхинчен тухăçлăрах

ирттерессе шанса утатăн.

Шевле юхать чĕркĕмĕл пек.

Йăсăрланать шур тумĕ мартăн.

Юр шукăль выртрĕ хĕлĕпе.

Пăхсам: халь шукăлех те мар-тăр.

Çул хысакне татса, шарлак

тĕл-тĕл шĕнкĕртетет хăюсăр,

тĕл-тĕл — талпас апăршалла —

шыв пакăлтатăвĕ чарусăр.

Шкул партинчи тирек-çăка

çур хăнине тимлеççĕ шăпăрт:

пĕр чыхăнать, пĕр каçăхать

тирек çинче кил тупнă шăнкăрч.

«Ак çитрĕ хăй те — пуласси,

нумай пулмасть — умри тĕллевччĕ», —

тесе пуль шăнкăрчăн сасси

хайларĕ кĕвĕллĕ тĕрленчĕк.

 

2

Ан тив, çур техĕмĕ аван,

анчах та эс çакна-çке хапăл:

çур евĕр килнĕ саманан

пур ыр пĕлтерĕшĕ — ăс-хакăл.

Çĕршыв çыннийĕсен паян

ас-хакăлĕ кервен те тарăн.

Кунта, учитель, сан пая

кам тавлашса тунма пултарĕ?

Шутлатăн: ӳстĕр тивĕç сан.

Кун уттинчен ан юл-ха эс те. —

Мĕн пĕлнине асра тытса,

ăсталăха çивĕчлетесчĕ.

 

3

Манми учительсем, сире

хунавăрсем пĕр шутлăн пурте

килен-каян уявсерен

çырса саламлаймаççĕ пуль те —

пилсĕртен мар, ĕненĕрсем, —

кунсем хĕрӳ тесе калам-и? —

 

Тен, вăхăт çук хунавăрсен...

Çĕршыв утти — вĕсен саламĕ.

 

Пĕр пытармасăр каласан,

эп хам та ерçеймен çырмашкăн;

каю шăтать — кая юлсан,

ĕç манăçать те — юр çăвасшăн.

 

Анчах пирте кашнийĕнчех

çунать эсир чĕртнĕ хĕрӳлĕх.

Эсир пуртан-çке çут тĕнчен

вĕçевĕсем инçе те çӳллĕ.

 

Пирте ĕненнĕ шанăçа

ирхи хĕвел шевлин куратпăр.

Кĕтместпĕр канăç пурнăçа,

хаваслă та патвар утатпăр.

 

4

Шкулта эпир — каллех ача.

Ик уйăх маларах кăна-ха

хаваслăн кĕрлекен каçа

пырсаччĕ: мăшăрăн-хăрахăн,

кам çывăхран, кам инçетрен...

 

Хăвна вĕрентнĕ çынсене те

юлташсене курма тесен,

пур вак ĕçе-хĕле сиретĕн.

 

Тухма хавасчĕ те, анчах

кашнийĕн пуçĕнче пĕр тапхăр

экзаменти пек пăтăрмах:

вĕрентнĕ пек-и пурăнатпăр?

 

Эпир — капмар е яштака.

Куçсем çиçеççĕ тавлă, тӳрĕ.

Никам та çук тунсăхлакан.

Никам пулмарĕ ӳрĕк-сӳрĕк.

 

Сăнсем телейлĕ те таса.

Нумай чĕппĕрсенчен пĕри те

çунатсăр маррине курсан,

йăлтрарĕ сирĕн те сăн-питĕр.

 

5

Учитель, хĕн те сан ĕçӳ,

çут сăyару пек килĕшӳллĕ

сăнар кĕyекере те çук, —

пурнăçăмра курасчĕ ӳлĕм.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: