Браконьер


Сунарçă эп. Браконьерсем

Манран хăраççĕ. Çаратаççĕ

Вăрмансене çак ирсĕрсем,

Чĕрчунсене персе тытаççĕ.

Вĕсен тĕллевĕ — аш-какай,

Мулкач тытса çини — моралĕ.

Çакна пулах пуль эп пĕрмай

Путсĕрсемпе вăрçатăп халĕ.

Пĕррехинче çапла, хĕлле,

Каç пуличчен тăман уларĕ.

Тĕттĕмленсен вара — çĕрле

Чӳречерен такам шаккарĕ.

Тухсассăн куртăм: ку — Йăван,

Юратнă арăмăн пĕр шăллĕ.

Машинпалан Йăван: «Аван!

Уç хапхуна, йысна, пит шăнтăм...»

Çынсем килсессĕн хăнана

Чун-чĕререн эп савăнатăп.

«Часрах кĕр! — терĕм Йăвана, —

Мĕнле çулпа? Епле пурнатăн?»

«Пурнатăп лайăх. «Москвича»

Малтан шала кĕртесчĕ. Тытрăм

Паян эп виçĕ мулкача!

Иртен вара, йысна, пит выçрăм».

Чăнах, куратăп — салонра

Выртать пăшалĕ ун хăяккăн.

Тар çуннă шăршă аякран

Çапать. Выртать мулкачĕ акă

Куç умĕнчех. Вăт ку ача!

Чĕрчун тытма ăста-мĕн! Кулă

Питрен çухалчĕ: мулкача

Шеллемесен этем, мĕн пулĕ?

«Кхе-кхе! Кĕрер çурта, Йăван!»

Кĕрсен, тӳрех унран эп ыйтрăм:

«Кала, тархасшăн, эс, айван,

Мулкачсене паян ма тытрăн?»

«Çитмест, — каларĕ вăл, — какай,

Çавна пула, йысна, çӳретĕп

Ухутана халь эп пĕрмай.

Ик кĕпçерен кĕрслеттеретĕп!

Паян та, акă, уй-хире

«Москвич» çинех ларса вĕçтертĕм.

Пĕр мулкачне вара ирех

Салонранах персе ӳкертĕм!

Сар тилĕ тарчĕ чăтлăха:

Юр тарăн пулчĕ — тытаймарăм.

Тип-тикĕс вырăнта, ха-ха!

Ик мулкачне алран ямарăм!»

Çапла мухтанчĕ браконьер.

Пит тарăхтарчĕ ун сăмахĕ.

Каларăм: «Пуснăччĕ ĕнер

Эп вăкăра. Ун ашĕ — акă,

Сĕтел çинче. Астив, тутан!

Ĕрчет, эс,шăллăм, выльăх-чĕрлĕх

Хăв килĕнтех. Вара ялан

Турилккере аш пулĕ тĕрлĕ.

Какай тени кирлех пулсан,

Пур картара ман сакăр сурăх.

Ил эс пĕрне. Пăшал çакса

Çӳремелле мар санăн урăх».

Çапла вĕрентрĕм Йăвана...

Унтанпалан ик-виç çул иртрĕ.

Халь çӳремест вăл вăрмана

Ухутана. Ман ĕмĕт çитрĕ!

 

Туссем, каласшăн эп çакна:

Выç кашкăр евĕр пулас марччĕ!

Çӳрер пăшалсăр вăрмана,

Ĕрчетĕр кайăкĕ, мулкачĕ...

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: