Хĕвел çӳçлĕ, йăлтăр путăк питĕм...

Сăвар Эртиван | Сăвă | 1979 | 644


Хĕвел çӳçлĕ, йăлтăр путăк питĕм,

те асилтĕм шухă ĕмĕре,

çурхи сывлăм, тен, хускатрĕ питĕ, -

сана курнă кĕçĕр тĕлĕкре.

 

Ман çумра çĕн уйăх евĕр лартăн,

ывтăнать çупкамунти çеçке.

Алла тăсрăм çеç, юхайрăн тартăн,

çав каçсем чăнах çаплаччĕ-çке.

 

Эсĕ тин тултарнăччĕ вун çиччĕ,

эпĕ те пулманччĕ пуль ватах.

Сывласан та сывлăшăм вĕриччĕ,

карт сикеттĕм сĕртĕнсен кăштах.

 

Уйăх унтанпа миçе çĕнелчĕ,

миçе хут пуль çурăлчĕ çеçке?

Вĕри юнăм сивĕнсе кĕвелчĕ,

çамрăклăхăм çулçă тăкрĕ-çке.

 

Çумри мăшăрăм сан сăнлă питĕ,

тен, вăл мар, эс ху унăн пекрех?

Хĕвел çӳçлĕ, йăлтăр путăк питĕм,

сана курнă кĕçĕр тĕлĕкре…

 

2.04.1979.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: