Тăван кĕтесе


Тăван кĕтес! Мĕн пулчĕ-ши сана?

Выртать уй-хирĕ ака пуç курмасăр.

Çум курăк хушшинчи тыр кас кăна

Ши! шăхăрать çиме апат тупмасăр.

 

Ун-кун чупса пучах шырать арлан,

Хĕле валли кĕлечĕ унăн пушă.

Çухалнă путене те пуш уйран,

Кĕрхи сив çил кăна ӳлет пĕр хушă.

 

Çук выльăх чунĕ те витесенче.

Вĕсем масар пек тăлăххăн лараççĕ.

Çĕрме пуçланă кункăрасенче

Юспа йĕке хӳре хуçаланаççĕ.

 

Эс сӳннĕ май пуяççĕ пуçлăхсем,

Мĕн юлнă пеккине те çаратаççĕ.

Сан мулупах хăйсем валли çавсем

Ик-виçĕ хутлă чул çуртсем лартаççĕ.

 

Мĕн пулчĕ-ши сана, Тăван кĕтес?

Тата мĕн чул шар курĕ çĕр ĕçченĕ?

Шанатăп: пурпĕр ураланăн эс,

Ун чух Раççейĕн чапĕ те çĕкленĕ!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: