Асанне пур-и?


Ванюк шăллăм — кăтра çӳçлĕ, çаврака питлĕ ача. Кулнă чух икĕ пичĕ пăч путать. Куçĕ пысăк ун. Хура. Йĕпеннĕ хурлăхан евĕр йăлтăртатса çиçсе тăрать. Пĕррехинче Ванюкпа урамра выляттăмăр. Сисмен те: «Эй, шăркалчăсем, мĕнле чупатăр? — тени илтĕнчĕ. — Аçу-аннӳ килтех-и?» Хулара пурăнакан Мишша кукка иккен.

— Ух, маттур! — Ванюка утьăкка çĕклесе питĕнчен чăпăрт! чуптурĕ вăл. Мана çурăмран лăпкарĕ, вара кашнинех пĕрер шоколад пачĕ.

— Анне çырмана шыва кайрĕ, — пĕлтерчĕ Ванюк. — Атте арманта. Килте асанне кăна. Эпир — ак кунта.

Пӳрте кĕтĕмĕр. Кукка кучченеç нумай илсе килнĕ иккен. Пĕр сумка! Ванюк шăллăм, ăна-кăна тĕшмĕртеймесĕр, кашни çимĕç-кучченеçех тытса пăхма тăрăшрĕ.

— Ку мана валли, — терĕ хыпаланса. — Кăна эпĕ илетĕп...

Унччен шарламасăр тăнă асанне Ванюка айккинелле çавăтса кайрĕ, тем ăнлантарма тытăнчĕ.

— Апла лайăх мар, ачам, — тенине çеç илтсе юлтăм. Ахăртнех, асанне шăллăма ятларĕ пулас.

Ванюк кӳренчĕ. Мăрт-март тукаласа чӳрече патне кайса тăчĕ.

— Эпĕ тек санпа пурăнмастăп, куккапа пĕрле хулана тухатăп та каятăп, — терĕ вăл асанне енне пăха-пăха илсе.

Нумай пурăнмарĕ Мишша кукка пирĕн патра — каялла çула пуçтарăнчĕ.

— Ну, шăркалчăсем, атьăр эппин манпа пĕрле, — пире çупăрларĕ вăл. — Хула кăтартăп пĕрре.

Аннепе асанне пире укăлчаран тухичченех ăсатса ячĕç.

— Ванюк, чипер кай, ытла нумай ан пурăн, — терĕ асанне. — Эсĕ те, Петюк, ытлашши çĕтсе ан çӳре, — мана пуçран шăлчĕ вăл. — Юрать-и? Кичем пулĕ пире.

— Виçĕ çулсăр та таврăнмастăп, — хуравларĕ шăллăм пуçне вĕçкĕнле каçăртса.

Автобус çине лартăмăр та хуланалла çул тытрăмăр. Ял хыççăн ял тăрса юлать, хула çав-çавах курăнмасть. Çул тăршшĕпе минретсе пычĕ Ванюк: «Кукка, хулана час çитетпĕр-и?.. Кукка, хулана çитме тата мĕн чухлĕ юлчĕ?..»

Акă эпир Шупашкарта.

— Ай, мĕн чухлĕ машин! — аллипе унталла та кунталла тĕллесе пычĕ шăллăм. — Ай, мĕн чухлĕ çурт! Мĕн çӳллĕ-ĕ-ĕш!

Автобусран анса юлтăмăр.

— Халĕ уçăлмалла кăшт çуран утăпăр, — ăнлантарчĕ Мишша кукка. — Кунтан инçе мар.

Ванюк унран çаплах хăпмасть-ха.

— Кукка, сирĕн телевизор пур-и?

— Пур.

— Кушак пур-и?

— Пур. Тĕрлĕ йышши хитре пулăсем те нумай. Кĕленче савăтра ишсе çӳреççĕ.

Çитрĕмĕр куккасем патне.

— Кукка, сан теттесем пур-и? — тĕпчет Ванюк.

— Темĕн чухлех. Машина, экскаватор, трактор, вертолет. Тата мĕн... Мечĕк-тупă таврашĕ. Чи пахи — пирĕн килте канихвет-пĕремĕк мăй таран.

Хулана килнĕ кун лайăх пурăнтăмăр. Ванюк апла-капла турткаланмарĕ. Тепĕр ирхине вара...

Тепĕр ирхине куçне уçнă-уçман: «Кукка, сирĕн асаннĕр çук-им?» — тесе ыйтрĕ, ун-кун пăхкаларĕ. Кукка ним калама пĕлмерĕ пĕр хушă.

— Пирĕн килте, Ванюк, тем те пур, — терĕ вăл вăрахран тин. — Асанне кăна çук.

— Мĕнле апла? — тĕлĕнчĕ шăллăм.

— Çук çав. Асаннесĕр пурăнатпăр. Пысăкланса çитнĕ те хамăр тĕллĕн пурăнма тытăннă.

Ванюк нумай уяса тăмарĕ, пушмак тăхăнма тытăнчĕ.

— Асаннесĕр мĕнле-ха апла? — хыпкаланчĕ вăл. — Сĕт кам ăшăтса çитерĕ мана? Юмах кам каласа Ларĕ тата?

— Сĕт-и? — терĕ кукка. — Хам ăшăтса паратăп. Юмах-и? Юмах калама та ăста эп. Чи вăрăммине, чи кăсăклине каласа пама пултаратăп.

Ванюк куççуль юхтарса йĕрсе ячĕ.

— Асанне патне каяп... Асанне патне каяп, — урăх ним те калама пĕлмерĕ вăл.

Каллех çула тухрăмăр эпир: шăллăм, кукка тата эпĕ. Яла таврăнтăмăр.

Урамра хур чĕпписене килелле хăваласа пыракан асаннене курсан йăмра урама ян янăратса кăшкăрса ячĕ Ванюк: «Асанне!» Унтан такăна-такăна ун еннелле ыткăнчĕ.

— Ах, пепкем, — аллине ик еннелле сарчĕ асанне. — Виçĕ çул иртсе те кайрĕ-им?

— Вйççĕ мар, пиллĕк те иртсе кайрĕ пуль, — асанне çумне йăпшăнчĕ Ванюк. — Эпĕ сана тек нихçан та пăрахса каймастăп. Юрать-и, асанне?

— Юрĕ-çке, юрĕ. Ну, хулара мĕн куртăн?

— Машинăсем тата...

— Тата мĕн пур унта?

— Куккасен хваттерĕнчи кĕленче савăтра пит хитре пулăсем ишеççĕ.

— Вара?

— Кушакки чĕвен тăрса малти урине яра-яра пăхать. Çук, тытаймасть пуллисене.

— Тем те пур апла хулара?

— Тем те пур, — ассăн сывларĕ шăллăм, — эх, эс кăна çук унта, асанне...

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: