Таçта шалта, кăкăрăмра...

Сăвар Эртиван | Сăвă | 1977 | 517


Таçта шалта, кăкăрăмра,

çитмĕл те çичĕ сăмахăм пӳлминче,

çитмĕл те çичĕ кăмăлăм çӳпçинче

аннем пилĕпе чĕркенĕ тĕшĕ-вăрă пур,

асамлă юрă акма çĕнĕ вăрлăх пур.

Эй, поэзи турри,

çав тĕшĕ-вăрра

çынсен чĕрисене акмалăх парăсăнччĕ,

акнă тырă-пулă çине

ăшă çумăр çутарăсăнччĕ,

сипетлĕ нӳрĕк ӳкерĕсĕнччĕ,

ăшă хĕвелне пăхтарăсăнччĕ,

пĕр пĕрчĕ акса

пин пĕрчĕ илме парăсăнччĕ.

Çак сăмахсем манăн мар –

аннем пиллесе хăварнăччĕ.

Эй, поэзи турри,

ан çырлах, ан хĕрхен.

Пӳрнĕ пулсан пил ту,

пӳрмен пулсан кĕл ту.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: