«Тĕлĕнтермĕш тĕнче ытамне ăнланмасăр...»1

«Тĕлĕнтермĕш тĕнче ытамне ăнланмасăр...»

Тĕлĕнтермĕш тĕнче ытамне ăнланмасăр,

Йăлтăр-ялтăр каçхи çутăсем хушшинче

Сан сăнна эп шырарăм пачах вăтанмасăр

Атăлран салхурах аслă Темза çинче,

Шупашкар аса килчĕ, шап-шур Шупашкарăм.

Унта пирĕн кĕпер, Мускав çулĕ çинче,

Атăл урлă каçсан юрă пурччĕ пĕр çаврăм,

Çухалайрĕ пулас хăвасем хушшинче.

Хамăрьен тус-йышри сар хĕвеллĕ тĕпренчĕкĕм —

Яштака хăва пек, сарă хăйăр пекех...

Сирĕлет кӳренӳ — килти кăмăл кӳренчĕкĕ,

Инçетре маншăн эс Тăван Çĕр вырăннех.

1968, пуш, 1.

Вестминстер кĕперĕ, Лондон.