Картсем

Эп ӳснине палăртмашкăн

Алăк сулли хĕррине

Чĕрнĕ атте картăн-картăн

Ӳсĕмĕн йĕрĕсене.

Йывăр та пурнăç — телейлĕ,

Курчĕ пурне те ачу.

Эпĕ те урăх ӳсеймĕп,

Карт картаканĕ те çук.

Юлчĕ — курса пурăнмалăх —

Халĕ — ӳссе çитĕнсен —

Вăрттăн çырулăх та палăк

Алăк сулли хĕрринче:

«Эпĕр сире кун кăтартнă,

Пулнă пуль йывăр, анчах

Савнă сире, пит юратнă,

Савăр эсир те çаплах...»

Çĕнĕ комментари хуш