Тыр-пул ăстине

Тăван çĕре юратнăран

Эп саврăм уйăм-хирĕме.

Кунта, ялта çуралнăран

Чĕрем туртать пуль ирĕке.

Хиртен вăй илнĕ-çке эпир,

Хиртех ӳссе çунатланайнă.

Кам курнă уй-хирти ире, —

Тĕпленнĕ, çирĕп тымар янă.

Ăна çĕр ĕçченне, савса

Сахал-и сăвă-юрă хывнă.

Ун мулĕ — пилĕкне авса

Пуçтарнă ылтăн пĕрчĕ тырă.

— Мухтав, — теетĕп пуç тайса. —

Хура тăпра çынни, ял-йышăм!

Эс кĕртнĕ тырă пуçтарса, —

Чунри сăмахăма та йышăн.

Сана савса юрлать тăри те,

Хĕвел сăпки çине ларса.

Уй-хирĕм хумханса тăринччĕ,

Шав ĕмĕр-ĕмĕр юрласа.

Çĕнĕ комментари хуш