Шурсухал сăмахĕ

Геннадий Юмарт | Сăвă | 1 335


Чулхула, Мускав шуйханнă тет,

Халăха епископ ӳкĕтлет.

 

Матĕрне суяс тесех суять,

Тӳрĕ сăмаха пăсма хăять.

 

Ултавпа çапла хистенĕрен

Пулĕ-ши усси ку "чăн тĕнрен"?

 

Йышăнма хушман темерĕм-çке,

Тĕрĕсех пĕлтертĕм тĕлĕке.

 

Ним çукран сармарăм сăмаха,

Тĕлĕкне эп куртăм чăнахах.

 

Курăнчĕ мана пĕр шурсухал,

Кăмăллăн мана тыттарчĕ ал.

 

Хăйпеле хăпартрĕ тӳпене,

Кăтартса çӳрерĕ тĕнчене.

 

Хумханать сап-сар тыр-пул унта,

Выльăхĕ — ем-ешĕл çаранта.

 

Çирĕмĕр шултра пăрçа татса,

Ячĕç чăвашсем хăна туса.

 

Куртăмăр унтах ик çĕлене —

Хурине те вут-хĕм тĕслине.

 

Вĕрентсе каларĕ шурсухал:

«Ан çухалтăр ĕмĕрхи хавал.

 

Йышăнсан та çĕнĕ йĕркене,

Ан пăрахăр ĕлĕк тунине.

 

Халăха çакна кайса пĕлтер —

Пурнăç пулĕ кунти пек чипер.

 

Эс çапла тума килĕшмесен

Пулăн çимĕçĕ çак çĕленсен:

 

Парĕç пăрахса вĕсен умне,

Урăх курмăн савăнăç кунне...».

 

Хушнине каларăм халăха,

Тумасан — кĕтет-çке аçтаха.

 

Пӳлĕх пӳрчĕ мар-ши çаплалла

Ик тĕне пĕрле çураçмалла?

 

Татăлса кайсассăн тĕп тымар

Сан чуну та ĕнтĕ санăн мар.

 

Турă, тен, пуриншĕн те пĕрре?

Ячĕ тĕрлĕрен-тĕр тĕнчере.

 

Халь мана кĕтет-ши ыр-сăвап?

Е сăвапшăн тӳсĕп хĕн-асап?

 

Сăварпиччĕ ĕлĕк Матĕрне...

Тĕрмене чикет-ши Етĕрне?...

 

Пӳлĕхçĕм, çуралнă ял Мучар

Куçăмран çĕтессинчен эс чар!

 

Çĕленсем пек тĕрлĕ тĕн пире

Упранма хистетĕр тĕнчере.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: