Тухья

Геннадий Юмарт | Сăвă | 1 092


Тухья — чăваш элемĕ,

Чăвашлăхăн палли.

Тухья — чăваш илемĕ,

Тухья — хĕрсем валли.

 

Юрлаççĕ мухтамашкăн

Сар йĕкĕт ячĕпе:

Савмашкăн-вылямашкăн

Тухьяллă хĕр чипер...

 

Хĕрсем татах та капăр

Пуçри тухйипеле.

Хăна кĕтме тухатпăр

Тухья çутипеле...

 

Чăвашăн пихампарĕ —

Тухьямăрăн çути —

Пире упранă мар-и

Паян куна çити?

 

Тухать ума асамлă

Алтайăн ту хырçи.

Унта-çке тăхăмланнă

Тĕп несĕлсен чĕрçи.

 

Тухья пек пулнă теççĕ

Унти пĕр вырăна.

Тен, кăшт хитрелетеççĕ

Халапсенче ăна?

 

Анчах йăх пуçĕ — кашкăр

Тăвать унта йăва:

Камах çитсе-ха каçтăр

Çак вăрттăн çĕршыва?

 

Пĕр ачана хăтарнă

Çак ырă чун-ама.

Леш вун ача хăварнă

Тĕреклĕн хунама.

 

Тĕрек тесех каланă

Çав кашкăр тăхăмне.

Тухья тесе ят панă

Малтан хăйсен йăхне...

 

Йăва пек туллă вырăн

Кун панă-çке йăха.

Ятра туятăн ыррăн

Çак икĕ сăмаха.

 

Ту ĕлкине куратăн

Тухья кӳлепинче,

Тĕсне те тавçăратăн

Ун симĕс шăрçинче...

 

Хĕвел, тӳпе сăнарĕ —

Тухья эрешĕнче.

Çапла ĕненнĕ мар-и

Упрать çӳлти тĕнче.

 

Хальччен чыслать-шим халăх

Кун курнă çĕршывне?

Нухрат-мерчен тухьяллă

Тухать тĕнче умне.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем