Каçхи урамра

Борис Борлен | Сăвă | Капкăн | 566


Алтăк-кăлтăк1 урамра

Алчă-мăлчă2 яланах,

Явăнать анра-сухра3,

Акăш-макăш савăнать.

 

Куçĕсем армак-чармак,

Тумĕ те авкум-шавкум4,

Анăш-тăнăша5 чарма,

Эх, никам та çук çав, çук.

 

Пуçĕнче — арпа-тĕрпе,

Ариш-пирĕш уткалать.

Иртĕхсе асса-тĕссе

Аскăн-тĕскĕн6 пурăнать.

 

Самани асар-писер,

Ампăс-тăмпăс7 та тискер,

Юп курас тесен чипер

Пурнăçа пĕлсе тинкер.

 
1 Алтăк-кăлтăк — путăк-шăтăк
2 Алчă-мăлчă — йĕркесĕр
3 Анра-сухра — ăсран тайăлнисем
4 Авкум-шавкум — тирпейсĕр
5 Анăш-тăнăш—йĕркесĕр
6 Аскăн-тĕскĕн — аскăнчăк çын
7 Ампăс-тăмпăс — такăр мар

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем