Эс килен те...

Алексей Воробьев | Сăвă | савни | 394


Куртăм та сана, савниçĕм,

Чун пуçларĕ ăшăнма.

Эс каллех уяв пек çиçĕн,

Çутăн манăн ăшăма.

Кăмăлăм папка кăларĕ,

Çулçă хушĕ чун-хавал.

Юрату, шевле-кăварăм,

Ан хавша та ан çухал.

 

Эс пулмарăн — йывăр çул,

Терт хӳми те хăтсăр çӳллĕ,

Кăкăрта вĕрет куççуль,

Çын курман арçын куççулĕ.

Ак уçан кил хапхине, —

Çил шăпах, каллех кун лайăх.

Сăвă хурăнĕ çине

Пăр-р! вĕçсе анать сар кайăк.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: