Пура

Николай Теветкел | Сăвă | 2 824


1

Хĕрсех пураççĕ платниксем пура,

турпас çеç сирпĕнсе тăрать чăл-пар.

Çак килĕшӳллĕ сăн, хăйне кура,

ман шухăш тĕввинчен ярать тымар.

 

Касатпăр та чутлатпăр япалан

кĕлеткине ăсталаса час-час.

Ĕçлетпĕр йышпалан та ялпалан

паллах, сăлтавсăр сирпĕнмест турпас.

 

Асăрхама пулать ку ушкăнрах

пуш параппан çапан çăмăлттая.

Турпас нумай та — çук усси унра,

вăл пурнăç йывăçне ярать сая.

 

Турпас купи çеç хăварсан çĕре,

вăл мĕн тума çуралнă тĕнчере?

 

2

Çурт-йĕр турпассăр çĕкленмест çӳле:

ку маншăн аксиома яланах!

Ват йăмраран ял варринчи кӳлле

сăн ӳкнĕ пек, вăл кĕнĕ йăлана.

 

Турпас кирек мĕнле ĕçре те пур:

Тĕлĕнмелли те тупăнать, чăнах.

Кун ыйтăвне ăспа «чутлан» маттур,

куран çынна «савалакан» çыннах.

 

Каç-каç çыру cĕтĕлĕн хушшине

ларатăп та — тĕп шухăша шывра

йĕрленĕ пек — çырулăх нушине

тӳсетĕп сăмахсем шыра-шыра.

 

Ан тив, сăмах турпасĕ вĕçтĕрех —

эп хывăп шухăш никĕсне пĕрех!

 

3

— Ĕç хатĕрне тирпейлĕ тыткала,

ан вырттăр тутăхса пуртту-саву, —

ăс пачĕ ват ăста мана çапла, —

ăсталăхпа çул уçтăр мухтаву.

 

«Кирлех-и вăл мана? — шутларăм эп,

юрла-юрла шуратрăм пĕрене. —

Ялйышăмра пулсассăн чыс-хисеп,

пăхкалĕ-ха мухтав та ман енне».

 

Ĕç хатĕрĕ юсавлă тăчĕ ман!

Шăлларăм пăчкă: кастăр çивĕчрех.

Пуртта хăйрарăм — каймĕ вăл алран:

Эп ланчашка Пуласшăн мар ĕçре!

 

Хам сăмаха çырулăх ĕçĕнче

кайран хăйрарăм чун хăйри çинче.

 

4

Çапла чăваш йăли: ниме чĕнсе

çуртне те хăпартать ялйышпала.

Сăра тултарнă алтăр чӳхенсе

çӳрет вара кайран алран алла.

 

Çакна сăнанăçем, çунатлă вăй

мана çĕклет хаваслăн тӳпене.

Ун чăн хуçи, эппин, ман халăх хăй:

Калас сăмахăм çитмелле пине.

 

Пуçра капланнă шухăш юхăмне

эп уссăр пăвелесшĕн, апăрша.

Йĕвен тахăнтараймăн ун хумне,

чĕнеймĕн пулăшма кӳрше-арша.

 

Калас сăмах тăмасть пулсан ниме,

салантăр вăл та — мимери ниме!

 

5

Ян! сас паран хыр пĕрене

хуратпăр мăк — вăл ăшă та çемçе.

Упрать вăл сĕм вăрманăн ăшшине

хаяр хĕл сиввинче, çил уççинче.

 

Турат куçне пăхатăп та унта

куратăп унăн сухăр куççульне.

Йĕрет пек йывăç сассăр, тупата:

«Калла тек тухас çук вăрман çулне».

 

Чăнах-та, шухăша путма ансат,

(те шухăш ку, те кăлăх йӳтени?):

Хăй йышĕнче, ăспа ураланса,

çак çурт пекех ӳсмест-и çын тени?

 

Ак парадокс! Ун тупсăмĕ пурах:

тен, эпĕ те хăпаракан пура?

 

6

Çĕн çурт яла именнĕн пăхкалать:

мĕнле çемье, мĕнле хăна-вĕрле —

хак парĕ унăн ăшчикне, кала?

Вара курма та кĕрĕпĕр пĕрле.

 

Ача сасси е выльăх макăрни

ун картишне илем кӳрет пулсан

эп калăп: ку вăл — ăраскал парни

чӳречине ан пустăрччĕ тусан.

 

Ларать йăлт-ялт пăхса çеç тарават

çĕн çурт йăмраллă урамра паян.

Телейлĕ вăл: кӳрши-арши савать

хуçисене сума суса ялан.

 

Çынна кам хапăл мар — çулне хупать,

ял манăçу тусанĕпе хуплать.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: