Атăл юрри

Силпи хĕрĕме

Ачаш ача пек Атăл ирхине:

Ăш çил лăпкать, вăл тутлан анаслать...

Вăран, савни! Уç чатăр аркине,

Мал ен сана хаваслăн саламлать!

Ĕçри ĕçчен пек Атăл кăнтăрла:

Вылять ун çийĕн тĕтĕм те ăрша...

Кунта мухтавлă тинĕс пулмалла,

Эппин ĕçлер-и, тусăм, тăрăшса!

Пуса каччи пек Атăл каçхине?

Юрлать, ташлать, кăшт хĕрĕнкĕ курнать...

Мĕн пулчĕ, тусăм, санăн киммуне,

Çут уйăх çулĕнчен ма пăрăнать?

Çулри юлташ пек Атăл сĕм çĕрле:

Инçе-инçе чĕнеççĕ çутисем...

Çитер, савни, пĕр тухнă çĕрелле,

Эпир — пулас мăн тинĕс хуçисем!

Çĕнĕ комментари хуш