Кайрĕ çав

Пĕччен юлтăм, кайрĕ çав,

Мăнтарăна кайрĕ çав.

Унăн сăнĕ куçăмра,

Ун кăмăлĕ ăшăмра.

Мĕнпур кăмăл ун çинче,

Пур телейĕм чĕрииче.

Хурланатăп — хуралап,

Шухăшлатăп — шуралап.

Сарă çӳçĕм саланчĕ,

Çутă куçăм çулланчĕ.

Ăшăм-чикĕм вут та хĕм,

Таврăнĕ-ши телейĕм?

Иртет çамрăк ĕмĕрĕм,

Çитĕ-ши ман ĕмĕтĕм?

Пӳлĕхçие асăнап,

Тавăрмашкăн тархаслап.

Ирхи тĕтре тĕтре мар,

Пĕлĕтпеле мăшăр мар.

Куçшыв; пите çума мар,

Телейпеле мăшăр мар.

Анчах пĕлĕт тĕтĕме

Çĕклет хăйĕн çумнелле;

Куçшыв урлă телейĕме

Çавăрăн-ши килелле?

Çĕнĕ комментари хуш