Виталий Станьял: Пульницӑри сӑвӑсем

Виталий Станьял19.02.2026 20:471286 просмотров

2026 ҫулхи нарӑсӑн 5-16-мӗшӗсенче сыватӑшра (ҫар ветеранӗсен Шупашкарти госпиталӗнче) выртрӑм. Унта муталаннӑ сӑвӑсене пӑхса илӗр-ха...

* * *

7.02.2026

Вӑрнар чӑвашне Сергей Андреева

Тӑн мӑкалать. Чакса пырать ӑс-хакӑл.

Ӑшри ятсем каяҫҫӗ манӑҫа.

Пурнас пулать. Тек урӑхла мӗн тӑвӑн?

Хӑв ирӗкпе утаймӑн канӑҫа.

Пуҫ ҫаврӑнать. Пӗтсе пырать вӑй-халӑм,

Нуша ҫӗре кайма тесе тӑрсан

Чупса эс пытӑн, патӑн ҫирӗп алӑ –

Вӑю ҫӳлти хӑват пек пулчӗ сан!

Чун савӑнать. Утас ҫулсем пӗтмен-мӗн

Сан пек хастар ҫынсем пулсан ҫумра.

Текех усал-тӗсел ҫулӑхнине итлемӗп –

Таса тӗнче йӑлтӑртатать умра!

* * *

9.02.2026

Пурнӑҫ каҫми ҫырма урлӑшӗ мар,

Капӑр кӗперлӗ вӑл пулмарӗ.

Каҫрӑм пӗрех васкавлӑн та вӑр-вар,

Тен, каясси те тек юлмарӗ.

Юлчӗҫ хыҫа аваллӑх сукмаксем,

Кукӑр ҫулсем тӳрленеймерӗҫ...

Тӳрӗ иккен пуласшӑн пуҫтахсем,

Мана вара ухмах-ха эсӗ терӗҫ.

Ӑсли-ухмахшӑн ҫут тӗнче пӗрре,

Чӑтни те савӑнни ҫеҫ питӗ тӗрлӗ.

Ҫанталӑкра пур хӗвелпе тӗтре,

Пӗрин – хӗвел, теприншӗн – вӗҫсӗр нӳрлӗх.

Ман пек ухмахшӑн та ҫут тӗнче хитре,

Вӗсем те ман пекех иккен телейлӗ!

* * *

12.02.2026

«Какой светильник разума угас!»

Николай Некрасов о Додролюбове

Ан макӑр, Чӑваш ҫӗрӗ!

Пӗри куҫне хупса

Ӗмӗрлӗхе инҫе тухса кайнишӗн...

Ун евӗр ачусем нумай-ха сан,

Ӳпкелешсе ан хуҫӑл та ан ишӗл!

Ялав вӑл йӑтрӗ малтисен ятне,

Тӗрӗслӗхпе тӑванлӑхшӑн пуҫ хучӗ.

Тен, хаклама пӗлмерӗ пуль ратне –

Пурин те тупӑнаймӗ ҫав ӑс вучӗ...

Вӑл йыхравларӗ мал ҫула тухсан,

Хастарсене ушкӑнласа пуҫтарчӗ.

Ҫӗкленчӗ хирӗҫ мӑриккан купца,

Йӗксӗк юлташ пуянлӑх енне тарчӗ.

Ан пӑшӑрхан, Чӑваш!

Ҫул хупӑнман!

Пӗр ывӑл ҫухални вӑл нишлӗх мар-ха...

Пире хуплаймӗ сутӑнчӑк тӑван,

Пуҫа усмастпӑр сӳтӗк кирлӗ-маршӑн!

Сана пӑрахмӗ ӑшшӑн ас тума

Кӗреш юман, хура вӑрман пек халӑх.

Ҫӗн тапхӑрта ҫӗнӗ кӗпер хывма

Сан ятупа ҫӗкленӗ пин-пин алӑ.

* * *

15.02.2026. Сыватӑшри калаҫуран

Ватти: Ҫилленнӗ Тур мучи, хӑйне эп ӗненменшӗн,

Мана леш тӗнчене вӑл йышӑнман.

Хӑварнӑ-тӑр сире йӗрӗнтермешкӗн,

Тунката пек хытса ҫеҫ пурӑнма.

Шураппасем: Ҫук, апла мар. Ват ҫын – тӑватӑ ҫын.

Ватти пулсан йӗрке те пулаканччӗ.

Ҫулсем пурри кӑштах хӑратӑҫин,

Ывӑнсанах, эппин, пӑртакҫӑ канччӗ.

Ватти: Ҫапли ҫаплах-ха. Пулмалла йӗркеллӗ.

Анчах этемӗн ӗҫ те тумаллах.

Кашни юман тӑвать нумай йӗкелӗ...

Йӗкелсенчен вӑрман хӑпартмалла!

Шураппасем: Мӗн чухлӗ панӑ, ҫавӑн чухлӗ пурӑн.

Чӗр пурнӑҫран пахараххи тек ҫук.

Тен, йӳтесен, пушмак ҫине те хурӑн.

Тасатӑпӑр - пӑхакансем пур чух.

Ватти: Туй ывӑлсем таҫта-таҫта выртаҫӗ

Амӑшӗсен чунне вут хӑварса...

Вӗсемшӗн пурӑнас-им манӑн раҫвӗ

Пурнӑҫ хакне пӑртак ҫеҫ хӑпартса...

Шураппасем: Вӑт ҫавӑ ҫав! Пурнас пулать-ха пирӗн

Чӑтас пулать малаш куна шанса.

Куллен кун тӑрӑшсассӑн каҫӑн-ирӗн

Ҫӗршыв та юлмӗ шӑппӑн пушанса...

Ватти: Тавах, шураппасем, ыр кун суннишӗн!

Телей сире ҫутаттӑр хӑвӑра.

Хисеп туса ват салтаксен кил-йышӗ

Пуҫа пӗксе тӑрать сирӗн умра.

От редакции: Размещение статей не означает, что редакция разделяет мнение его авторов.

[Добавить новый комментарий (10)]

Agabazar // 4213.59.1058 2026.02.19 21:06
	Станьял, тавтапуç сана сыватмăш вырăнне сыватăш теме ăс çитернĕшĕн.
кустюмер ачи // 3033.17.5681 2026.02.20 00:44
	Вӑрнарсем ыр ҫынна таса чунпа пулӑшаҫҫӗ. Станьяла та пулӑшнӑ.
ав ЛЕРИ ТУРХИШ // 3984.73.0041 2026.02.27 20:26
	Старик сӑввисем ватӑ. Поэие чечексем, юрату,чупту тата леш кирлӗ. Станьялӑн ҫавсем ҫук вара! чисти больница кӗвви вӗт старикӗн!
Леонид Кевер // 3413.78.3147 2026.03.01 02:50
	В.Станьял сӑввисем хальхи пурнӑҫпа тачӑ ҫыхӑнса тӑраҫҫӗ.Вӗсем, кирек мӗнле куҫпа пӑхсан та, ҫителӗклӗ шайра.Чире пӑхмасӑрах йӗркеллӗ ӗҫлеме пултарнӑшӑн ӑна мухтав!
АкСАЛИНА // 1456.94.4058 2026.03.08 02:30
	Ак тата ! Ҫын чунӗ ватӑлать-и вара?! Лайӑх каланӑ ку вӑхӑт ҫинчен.
ПетӗрСем. // 2948.34.8346 2026.03.09 09:17
	<i></i> Тӗрӗсех ҫырать Виталий Петрович.
пакки // 2301.71.5412 2026.03.12 21:15
	ҪӗТӗК сӑвӑсем паян ҫынна кирлӗ мар. шареннӑй хыпар. укҫа, вӗлерги-вӑрлани пар! Вот так!
Галина Зотова // 1036.03.6689 2026.03.14 20:29
	Виталий Петрович! Эсир хитре мар комментарисене ан та вулӑр! Леонид Кевер тӗрӗс хакланӑ Сирӗн сӑвӑсене. Сире малашне те чир-чӗрсене ҫӗнтерсе пырса творчествӑра ӑнӑҫусем сунатӑп! Сирӗн вӑй-хӑватӑр мана Сирӗнтен тӗслӗх илсе пурӑнма хавхалантарать. Больницӑра выртса курман ҫын ҫеҫ ҫӗтӗк сӑвӑсем пирки лӑпӑртатма пултарать. Шӑпа ҫавӑн пек пулчӗ манӑн та, больницӑра вӑхӑтӑн-вӑхӑтӑн сипленсе кун-ҫула тӑсма тивет, тулта хӗвел хӗрте пуҫларӗ, хӗл каҫипе мана савӑнтарнӑ кайӑксем: уйӑпсемпе кӑсӑясем кӗҫех вӑрманалла ҫул тытӗҫ, эпӗ вӗсене яланах кунне 3 хутчен хӗл каҫипех тӑрантарса пурӑнатӑп, кураксем вӗҫсе килнӗ, шӑнкӑрчсем те кӗҫех ҫитӗҫ, пирӗн йӑвасенче халлӗхе курӑнмарӗҫ-ха, пурӑнатпӑр-ха!
Agabazar // 3612.7.2523 2026.03.15 15:33
	Ĕмĕрĕпех вара çав тролльсенчен хăраса-чĕтресе пурнăпăр-и?
СТАНЬЯЛ // 1421.64.6398 2026.03.15 17:28
	Ырӑ сӑмахсемшӗн тавах сире, Акапасар, Кевер,чутайсем ГАЛИНА ЗОТОВА... Сыватӑшра эпӗ пурнӑҫа ҫапла курнӑ ҫав! Шухӑшсемпе чуна пусарнӑ та вӑхӑта пытарнӑ. Тиркени те тӗрӗс пулӗ - вулакана хӑйне мӗн килӗшменнине пӗлтерни мана кӳрентермест.