Паян — Ҫӑварни эрнин юлашки кунӗ. Каҫару ыйтмалли вырсарникун тесе паян пӗр-пӗрин патне шӑнкӑравлаҫҫӗ, тӗрлӗ открытка ӑсатаҫҫӗ, СМС-ҫыру вӗҫтереҫҫӗ. Пӗрне-пӗри ҫулталӑкӗпе кӳрентеретпӗр те кайран, пӗр кун, пӗрне кура тепри каҫару ыйтатпӑр.

Каҫару ыйтма пӗлни лайӑх пулӗ-ха. Анчах ҫав сӑмахра чунтан ӳкӗнни чӗрне хури чухлӗ те пур-ши? Ҫук пек туйӑнать.

Кӳрентерни тенӗрен... Мӗншӗн-ха эпир пӗрне-пӗри кӳрентеретпӗр, кӳренетпӗр? Сӑнанӑ тӑрӑх, чи йывӑр кӳрентерекенсем — ҫывӑх ҫынсем: мӑшӑр, ача-пӑча, тӑвансем, тус-юлташ тесе шухӑшласа пурӑннӑ ҫынсем. Ҫакӑнта асӑнса кайнисенчен малтанхи виҫӗ категорине сӑмахсӑрах каҫарма пулать тейӗпӗр. Вӗсем, мӗн тесен те, пире усал тумаҫҫӗ. Вӗсем, мӗн тесен те, хӗрсе кайнӑ самантра кӑшт ытларах персе яма пултараҫҫӗ. Персе ярсан та ҫийӗнчех ӳкӗнеҫҫӗ, каҫарӑвне те тӳрех ыйтаҫҫӗ.

Тус-юлташ, ӗҫтеш пирки апла калаймӑн. Вӗсем ура хурас тесех ура хума ӑнтӑлаҫҫӗ. Мӗншӗн ҫавӑн пек пулса тухни пирки пӗр вӑхӑтра чылайччен пуҫ ватрӑм. Усал тунӑ ҫын усал тума хӑтланнине ӑнланмалла. Хӑв чунтан хисеплекен, хаклакан ҫынах тахӑш самантра курайми пулса тӑни мӗнрен килет-ши? Ман шухӑшӑмпа, ӑмсану-кӗвӗҫӳ пире ура хурать. Ҫынсен пысӑк мар, пӗчӗк ҫитӗнӗвӗшӗн те ҫӗтӗлетпӗр. Вӗсем пурӑнас тесе тапаҫланнишӗн те тарӑхатпӑр. Ют ҫын ӑнӑҫлӑрах пурӑнсан апла мар-ха — вӗсем ҫывӑх ҫынсем мар та ун пек йывӑррӑн йышӑнмастпӑр. Тус-юлташпа ӗҫтешсен пурнӑҫӗ, вӗсен кашни утӑмӗ куҫ умӗнче-ҫке.

Тепри пулсан, хӑйне хисеплекенни, ҫынтан хӑйне катӑк туйманни, теприн ӑнӑҫӑвӗшӗн савӑнӗччӗ, унпа мухтанӑччӗ. Хамӑра ытла та телейсӗр тесе шухӑшлани чунӑмӑра шӗкӗ пекех кӑшлать те вӗчӗрхенме тытӑнатпӑр. Тепӗр ҫынна кӑшласа ҫӳренӗ вӑхӑтра хамӑр ӑраскала асӑрхами пулатпӑр. Мӗн тӑвӑн, кашнин хӑйӗн ҫулӗ...