Амăш капиталĕ ача çуралассине ӳстерме пулăшмасть тесе шухăшлать «Утро.ру» электрон хаçат корреспонденчĕ Мария Трифонова.

Ача çуратнишĕн укçа тӳлеме йышăнни малтанласа тĕрлĕ калаçу çуратнине чылайăшĕ астăвать-тĕр. «Пуяннисем тем чухлĕ хурса парсан та уншăн çуратмĕç. Юрлисем тата сыпма юратаканнисем йыш хушса тултарĕç», – теме пăхрĕç хăшĕсем.

Ача çуратассине, маларах асăннă журналист шучĕпе, ĕç укçин шайĕ витĕм кӳрет. Çакна çирĕплетме Мария Трифонова Мускаври тата Санкт-Петербургри лару-тăрăва тишкерет. Асăннă хуласенче амăш капиталĕпе усă куракансем питех те сахал-мĕн, çапах та çуралакансен йышĕ йышланса пырать.

Амăш укçине усă курни йышлă 10 региона илсен тăваттăшĕнче кăна çуралассин коэффициенчĕн динамики Раççейринчен аванрах (+29 процент) пулнă.

Çуралассине 2009 çултанпа тишкерсен, шăпах çавăн чухне амăш укçине пама тытăннă, асăннă кĕмĕлпе хастар усă куракан 10 регионтан пиллĕккĕшĕнче çураласлăх чакнă иккен. Тăваттăшĕнче вара çĕршыври вăтам кăтартуран пĕчĕкрех.

Росстат 2012 çул пуçламăшĕнчи лару-тăру пирки пĕлтернинче амăш укçиллисенчен пĕрре виççĕмĕш пайĕ (34 проценчĕ) сертификат илме заявлени те паман иккен.

РБК асăрханă тăрăх, сахал тупăшлă çемьесенче амăш укçипе усă курассин коэффициенчĕ кăшт пысăкрах иккен. Сертификат илме заявлени çырман çемьесен хушшинче сахал тупăшлисем 45 процент иккен. Çакăн сăлтавне тĕшмĕртме кăткăсах мар-тăр. Амăш укçине чылайăшĕ çурт-йĕр ыйтăвне татса пама усă курать. Анчах ку тупра хваттер е çурт туянма çитменни паллă ĕнтĕ, çавна май ытти «кĕмĕлне» е пухса пымалла, е банкран кивçен илмелле. Илме илĕн те, анчах ăна тӳлесе татмалла-çке.

Тепĕр майлă каласан, ача-пăчана укçашăн çуратнипе нумай мала каяймăн-тăр çав.