Шупашкарӑн аслӑ урамӗпе утнӑ май Геннадий Никандрович Волков ячӗллӗ сквер пулмалли вырӑна ҫитсен яланхилле ҫак палӑкӑн шӑпи мана пӑшӑрхантара пуҫлать.

Ҫак пархатарлӑ ӗҫе пӗлтӗр пуҫӑннӑччӗ — 2013 ҫулхи кӑрлачӑн 25-мӗшӗнче конкурс ирттерсе Владислав Немцовӑн кӳлепене суйланӑччӗ. Вӑл метр ҫурӑ ҫӳллӗш, пӑхӑртан пулмаллаччӗ. Палӑк валли 1,2 метрлӑ гранитлӑ постамент та хатӗрлемеллеччӗ.

Унтанпа вӑхӑт шурӗ те шурӗ. Юпа уйӑхӗн 31-мӗшӗ те ҫитрӗ (паллӑ ӑсчахӑн ҫуралнӑ кунӗ), анчах палӑк Ленин проспектӗнчи вырӑна ниепле те йышӑнаймарӗ. Паян кун та унта пӗр гранит плита кӑна выртать. Сас-хура ҫӳренӗ тӑрӑх укҫи-тенкине ҫухатнӑ пулать-и?

Чи хӑрушши ҫакӑнта — паллӑ ӑсчаха, Раҫҫейӗпе мухтава тивӗҫлӗскере хамӑрӑн ҫынсемех ҫителӗклӗ палӑртма пултарайманни. Тепӗр тесен, тен, этнопедагогика хальхи вӑхӑтра чыслисен ретӗнчен тухса ӳкнинчен ку пырать? «Россиянин» текенскерсене ҫитӗнтерме хӑтланнӑран этнопедагогика кирлех те мар пулинех. Ҫавӑнпа та паллӑ ӑсчахӑн ӗҫне те ытлашшиех хакламаҫҫӗ те пуль.

Тепӗр енчен пӑхсан вара — ҫав вырӑнта пӗр-пӗр чиркӳ (ан тив, вырӑнӗ пысӑк мар тейӗпӗр, анчах часовня валли те пулин ҫитетех) туса лартма шутласанах ӑна срокне пӑхмасӑр хӑпартӗччӗҫ, укҫине те ҫителӗклех тупӗччӗҫ, ҫухатмӗччӗҫ, ҫаратмӗччӗҫ.

Тен, чӑн та, палӑкшӑн пӑшӑрханма кирлӗ мар? Пӗлтӗр те, кӑҫал та нимӗнле юбилей та мар. Ак 2017 ҫул ҫитӗ те — ун чухне вӑл 90 ҫул тултарнӑ пулӗччӗ — ҫавра ҫул тесе палӑк хӑйӗн вырӑнне тупӗ...