Килти бассейн пирки кам ӗметленмӗ-ха? Паллах, чылайӑшӗн килте бассейн тӑвас килет. Анчах ку вырӑн нумай йышӑнать-ҫке-ха. Анчах хальхи технологисем темӗн тума та май параҫҫӗ. Укҫа ҫеҫ пултӑр.

Мрамор урай айне пытарнӑ бассейн.

Hydrofloors компани тӑрӑшнипе ку ҫуртри урай бассейна ҫаврӑнма пултарать. Пускӑч ҫине пуссан урай аялалла анма тытӑнать, ятарлӑ шӑтӑксенчен шыв тулма пуҫлать. Ҫапла майпах бассейн урая ҫаврӑнать.

Пӗчӗк картише ҫаврӑнакан бассейн.

Ку бассейн дизайнне тата тытӑмне Hidden Water Pools компани шухӑшласа кӑларнӑ. Пускӑч ҫине пусмалла ҫеҫ – шывпа тулнӑ резервуар пӗчӗк картиш пулса тӑрать. Ку уйрӑмах ачаллӑ ҫемьесемшӗн меллӗ. Пӗчӗкскерсем выляма, ҫав вӑхӑтрах шыва кӗме пултараҫҫӗ. Бассейнри шыв тарӑнӑшне пысӑклатма, пӗчӗклетме пулать.

Пуш хирте пытаннӑ бассейн.

Бассейна кирек ӑҫта та тума пулать-мӗн. Пуш хирте те. Кӑмӑл ҫеҫ пултӑр. Кунашкал бассейн Кӑнтӑр Калифорнире пур. Ӑна маларах ҫырса кӑтартнӑ икӗ бассейн технологипе тунӑ. Унта кирек кам та шыва кӗме пултарать – тӳлевсӗрех. Анчах кашниех ӑна шыраса тупаймасть.