Чебоксары, Эльтеберу (Главе) Чувашской Республики О.А. Николаеву

Хытӑ шанса тӑракан, пирӗн чи аслӑ ҫыннӑмӑр, Эльтеперӗмӗр Олег Алексеевич!

Сире чӑрмантарма (вӑхӑтӑр темле ҫук пулсан та!) икӗ пӗчӗк ыйтӑва тишкерттерессе хускатма хӑюлӑх ҫитеретӗп. Сирӗн шанчӑклӑ канашҫӑсем камне пӗлместӗп, ҫавӑнпа тӳрех хӑвӑра кӑна шанатӑп.

1. Марина Карягина тележурналистка, ҫыравҫӑ кандидатурине «Халӑх писателӗ» ятне илме тӑратнӑ чухне тӗкӗ пама темиҫе вулакан тата ҫыравҫӑ мана тахҫантанпах ыйтаҫҫӗ, мӗншӗн тесен ӑна студент чухнеренпех лайӑх пӗлетӗп. Вӑл ун чухнех ӑслӑ, ҫирӗп, пултаруллӑ та ӗҫчен ҫилҫунатҫӑсем хушшинче танлаштарми таланчӗпе, анлӑ тавракурӑмӗпе палӑрса тӑратчӗ. Ҫак чыса хӑйӗн инҫекурӑмри ӗҫӗсемпе, илемлӗ сӑмахлӑх кӗнекисемпе ҫирӗплетсе пычӗ.

Марина Карягина кандидатурине халиччен кам мӗншӗн сирсе хӑварнине пӗлместӗп. «Ҫилҫунатра» унпа пӗр вӑхӑталла ӳснӗ Раиса Сарпие, Светлана Асамата хисепленӗшӗн тав тӑватӑп. Пултарусӑр, хӑйшӗн виҫесӗр тапаҫланакан Кипеч халӑх поэчӗ пулса тӑнӑ вӑхӑтра чӑнласа пултаруллӑ, халӑх ӗҫӗнче палӑрнӑ ҫыравҫӑсене сирсе хӑварни пӗлекенсене хытах пӑшӑрхантарать.

Марина Федоровна Карягина 55 ҫулӗ тӗлне республика хисеплӗ ятне илтме тивӗҫлӗ тесе шутлатӑп.

Кунта Сирӗн сӑмах ҫеҫ витӗмлӗ.

2. Чӑваш ачисем Пӗлӳ ани ҫинче нихҫан та ята яман. Анчах юлашки самана вӗренӳ ҫулне тӑван халӑхран, тӑван чӗлхерен, культурӑран ятарласа уйӑрса ячӗ. Пӗртен-пӗр чӑваш чӗмӗллӗ Герман Лебедев ячӗллӗ лицея, наци класӗсене, журналсене, хаҫатсен тӗллевлӗ ярӑмӗсене ултавлӑн хупрӗҫ. Мӑриккан Дж. Сорос миллиардер уҫса хӑварнӑ «Уҫӑ общество» Шупашкарти сутӑнчӑксене иртӗхтерсе хӑварчӗ. Чӑваш нацине вырӑссем, тутарсем, чеченсем умӗнче айванлатма хӑтланни ырра мар. Тӗлли-паллисӗр, ҫирӗпленнӗ йӑласемсӗр юлнӑ халӑх Патшалӑх хӳтӗлевҫи пулма пӑрахать. Халӑхсене пӗр пӗтӗмлетес шутпа патша вӑхӑтӗнчи пекех хӗстерни ҫӗршыва каялла таптарать!

Чӑваш Республикинче хамӑр халӑх историйӗпе, ӑс-хакӑл эткерлӗхӗпе ӗҫлекен ӑсчахсем пулччӑр тесен, наци чӗмӗллӗ, ҫивӗч пуҫлӑ ачасен ТӖСЛӖХЛӗ ШКУЛНЕ тата саланса кайнӑ чӑваш факультечӗсене чӗртмеллех. Таврара пурин те пур чухне чӑваш вара ҫуккипе малта! Пур та ҫӗтет, ҫук та ҫитет, пӗрех чӑваш тӗнчепе пӗрле анчах пӗтет.

Чӑваш халӑхӗн хырӑмне (экономикине) ҫеҫ мар, шӑпине хӳтӗлесси Сирӗн, хисеплӗ Эльтеперӗм. таса тивӗҫ, Халӑх Сире шанать.

Виталий Станьял, ватӑ таврапӗлӳҫӗ,

Шупашкар таври, Салтаккасси.