Чӑваш Енре кӑҫал Республика ертӳҫин — Элтеперӗн — пуканне йышӑнас тӗлӗшпе суйлав иртмелле. Вӑхӑчӗ те нумаях юлмарӗ ӗнтӗ, икӗ уйӑхран та сахалрах.

Ак, «Пӗрлӗхлӗ Раҫҫей» те хӑйӗн кандидачӗпе палӑрчӗ пулас — ячӗшӗн ирттернӗ «праймериз» (primary сӑмахран, чӑвашла вӑл «малтанхи» пулать, е кӗскен каласан — умсуйлав) текен мероприятире Михаил Игнатьева кӑларас терӗ. Владимир Путин ӑна отставкӑна (пукана вӑхӑтлӑха пушатни ӗнтӗ) яниех республикӑна малашне те кам ертсе пырасси паллӑ пулчӗ ӗнтӗ.

Лӑпкӑ Михаил Васильевич Мускава чӑнах та тивӗҫтерет ӗнтӗ. Малта мар пыратпӑр ӗнтӗ, анчах вӗҫӗнче те мар — варринче. Унашкаллисен шутӗнче пирӗн тӑрӑх кӑна мар, ыттисем те сахал мар. Пӗр «ӗмӗт» текенни кӑна республикӑна кӳршӗлле Тутарстан, Пушкӑртстан тата Чулхула облаҫӗсемпе юнашар курасшӑн. Мӗнех, тен, тепӗр суйлавра ҫӗнӗ ҫын килӗ те пире кӳршӗсен шайне хӑпартӗ. Ӗмӗтленме пире никам та чармасть вӗт.

Эп хам ҫак суйлавра «Тӗрӗслӗхлӗ Раҫҫей» партин пайташӗшӗн Анатолий Аксаковшӑн (парти хӑйӗн хаҫатӗнче эпир кӑларнӑ картта пирки те пӗлтернӗччӗ) сасӑлама тӗв тусаччӗ те, анчах суйлава ӑна хутшӑнтарасшӑн пулман иккен. Парти хӑй ятӗнчен маншӑн пачах та паллӑ мар темле Олег Николаева тӑратнӑ пулать. Аксаковӗнчен вара хайхи Раҫҫей экономикине ҫӗклекен ӗҫре усси ытларах имӗш. Ман шутпа ку политика вӑййи кӑна — вӑйлӑ кандидатран хӑтӑласси.

Ыттисем камсем пулӗҫ? ЛДПР таҫти ютри ҫынна шанас тенӗ — Константин Субботина ярӗҫ пулас. Вӑл Свердлов облаҫӗн Думин депутачӗ иккен, ҫамрӑк, 33-ре кӑна. Уншӑн ӗнтӗ, паллӑ, пӗр парти пайташӗсем кӑна сасӑлӗҫ. Мӗнле чӑваш, вырӑсланнӑ пулсан та, тӑван тӑрӑха ют ҫынна патӑр-ха? Тата темле Алексей Рылеев пур — «Тӑван ҫӗршыв» партирен. Вӑл 0,5% пухайӗ-ши ӗнтӗ… Калама хӗн.

Кӑсӑклӑ кандидатсене илес пулсан Валентин Шурчанова тата Эдуард Мочалова асӑнма пулать. Вӗсем пулмасан чӑн та суйлав кичем иртнӗ пулӗччӗ. Шурчанова коммунистсем малтанах палӑртнӑччӗ, ака уйӑхӗнчех, анчах унӑн нумай сасӑ пухасси пулмасть пуль ӗнтӗ. Тем тесен те унӑн электрорачӗ, уншӑн сасӑлакансем — ватӑрах ҫынсем. Вӗсем вара сахаллансах пыраҫҫӗ. Енчен те пӗр вунӑ ҫул маларах пулнӑ пулсан, тен, шанӑҫӗ пурччӗ те пулас, анчах хальхи вӑхӑтра Раҫҫейре СССР тапхӑрӗшӗн тунсӑхлаҫҫӗ пулин те коммунистсен идиологийӗ тем тесен те вӑйлах мар. Мочаловӗн вара малтан халӑхран шанӑҫ илмелле — алӑ пуснисене пуҫтарас пулать. Ку ӗҫ пӗрре те ҫӑмӑл марри каламасӑрах паллӑ. Пухмалла тата кайран суйлав компанине пуҫламалла.

Вӑт, ҫавӑнпа та ним иккеленмелли те ҫук — суйлав кӑҫал лӑпкӑ иртӗ. Элтеперӗн ячӗ-хушамачӗ ылмашӑнмӗ — унчченхи пекех тилхепене Михаил Васильевичах тытса пырӗ.