Ун пек тискер çынсем пур тенине илтмен мар-ха, анчах вĕсем пирĕн хушăрах пулассăн туйăнманччĕ. Пирĕн хушăрах терĕм, мĕншĕн тесен кун пек йĕрĕнмелле тата нимле те тÿрре кăлармалла мар хăтланаканĕсем – 38 çулти Çĕрпÿ арçынни тата Шупашкарта пурăнакан 25 çулти хĕрарăм. Вĕсем çул çитменнисем тĕлĕшпе ясарлăх енчен пÿтсĕрленнĕ. Арçынни кун пек факта 25 хутчен тунă, хĕрарăмĕ – 2 хут. Куншăн вĕсен тĕлĕшпе РФ Пуçиле кодексĕн 132-мĕш статйин 4-мĕш пайĕн б пункчĕпе пуçарнă пуçиле ĕçе тĕпчесе пĕтернĕ ĕнтĕ. Арçыннине тата çул çитменнисемлĕ порнографи материалĕсем пухнăшăн (кун пекки унăн 3 тĕслĕх пулнă иккен) тата çул çитменнисене порнографи материалĕсем хатĕрлеме усă курнăшăн, ясарлăхпа çыхăннă ĕçпе аппаланма хистенĕшĕн айăплама пултараççĕ.

Тĕпчевçĕсем палăртнă тăрăх, арçын 2010 çулхи чÿк уйăхĕнчен пуçласа 2014 çулхи утă уйăхĕччен вăл тĕрлĕ çĕрте: арăмĕн Шупашкарти хваттерĕнче, Шупашкарти Энгельс урамĕнчи гаражсен территорийĕнче, Атăл хĕрринче, саунăра, Çĕрпÿри хăйĕн хвтатерĕнче тата Çĕрпÿ районĕнчи килĕнче – 9–10 çулхи тăватă хĕрача тĕлĕшпе тата ячĕсене палăртайман 12 çулсенчи икĕ арçын ача тата хĕрача тĕлĕшпе ирсĕрленнĕ. Икĕ тĕслĕхĕнче унăн 25 çулти паллакан хĕрарăмĕ те пĕрле пулнă. Кунсăр пуçне арçын 2013 çулхи çулла тата 2014 çулхи ака уйăхĕнче Çĕнĕ Шупашкарти 11 çулти икĕ хĕрачапа хĕрача пек пулса паллашнă. Кйаран вăл вĕсене улталаса тата хăратса ясарлăхпа çыхăннă ĕçпе аппаланма ирĕксĕрленĕ. Мĕн тунине «Скайппа» ÿкерсе илнĕ.

Арçыннăн арăмĕ йĕркеллĕ çынах пулнă курăнать. Мăшăрĕ тĕлĕшпе мĕншĕн пуçиле ĕç пуçарнине пĕлнĕ хыççăн арăмĕ унран уйрăлнă. Тискер ĕçпе арçын арăмĕ урăх региона вăрах вăхăта командировкăна тухса кайсан пуçтахланнă.

Арçын унччен те тĕрмере ларнă. Унта вăл наркотик сутнăшăн 10,5 çуллăха лекнĕ. Анчах сакăр çултан ирĕке тухнă. Ирĕке тухнă та ирсĕрлĕнме тытăннă. Арçын айăпне суд палăртсан ăна 25 çул таран хупса хума пултараççĕ.

Ку лару-тăрура ачасен çывăх çыннисем ним сисменни те пур. Пĕчĕкскерсем калама хăранă-тăр çав. Тен, вăтаннă та пулĕ. Шар курнисенчен, юрать, иккĕшĕн ашшĕ-амăшĕ хăйсен тĕпренчĕкĕсем палламан çынпа СМС-çырусем шăрçаланине асăрханă хыççăн сисчĕвленнĕ. Малтанласа вĕсем çав этеме хăйсем тĕллĕн тупма пăхнă. Ырă мара сиснĕ арçын Мускавра тĕрлĕ хваттерте пытанса пурăннă. Анчах тĕпчевçĕсем çине тăнипе шыраса тупнă.