Янсакасси — çуралнă ялăм,
Ларать вăл аслă çул çинче.
Унта телей шевли вылянăн
Çуталчĕ çăлтăр пĕринче.
Хĕллеччĕ. Кунĕ шартламаччĕ.
Шавлатчĕ пӳрт тулли салтак.
Анне ак чей те лартса пачĕ —
Салтакшăн чун ăшши пăртак.
Анчах салтакăн сахăр çукчĕ, —
Влаçне те алла илнĕ тин.
Пĕр чей куркишĕн питĕ чухчĕ
Пĕрер тĕпренчĕк сахарин.
Ăна эпир те кăшт тутаннă:
— Ай-уй, вăл техĕмсĕр пылак!..
Пирĕн патра каç выртнă, каннă
Çул майăн пӳрт тулли салтак.
Ирпе ыйтать хайхи аннеçĕм:
— Эсир камсем çак, ăçтисем?
Вĕсем кĕскен çеç пĕлтереççĕ:
— Эпир, инке, коммунистсем!..
Анне сăхсăхрĕ: «Турă çăлтăр!
Эй, тĕлĕнтермĕш çут тĕнче!..»
...Кашнин çунать ав хĕрлĕ çăлтăр
Çĕлĕкĕпе çанни çинче.
Пĕрин те çук «антихрист» сăнĕ,
Вĕсем йăлт хамăр пек çынах.
...Çав кун асамлă çăлтăр кĕнĕ
Ман асăма яланлăхах.
Халь акă эп каç-каç тытатăп
Алла истори кĕнеки.
Тухса тăрать мăнаç ытла та,
Ытла та чĕррĕн ĕнерхи.
Вуланă май аван чухлатăп:
Пулнă иккен çав салтаксем
Йăлтах коммунистла бригадăн
Фронта çул тытнă çыннисем.
Чăн ирĕк пурнăçшăн çĕкленнĕ
Вĕсем хастар кĕрешĕве.
Умри çула çутатнă Ленин,
Вăл пулнă халăхшăн хĕвел.
Çĕршыв кĕç тăвалла хăпарчĕ,
Хĕрӳ ĕçре хăват илсе.
Малтан мала тет аслă парти,
Малтан мала, коммунистсем!
Умра ак çĕнĕ пилĕкçуллăх,
Чăн улăпла ĕçсен картти.
Кăтарт сулмаклă пултарулăх,
Коммунистла ĕç бригади!
Эп хам та пĕр ретрех утатăп,
Ку маншăн питĕ пысăк чыс.
Пулам ĕçре те, пурнăçра та
Таса чĕреллĕ коммунист!