Паян ирпе çула тухсан,
Эп тĕлĕнсе кăна-çке пытăм:
Çунса выртать таçтан-таçтан
Кĕр кунĕ сапнă чĕре ылтăн.
Çуралнă ялăм — ылтăн сад,
Хирте пĕр тикĕс ылтăн хăмăл.
Ун тăрăх ылтăн ывăтса,
Хĕвел чупать çăмха пек çăмăл.
Ыраш калчи, ав, ешерет
Çӳçеллĕ пурçăн тутăр майлă.
Çаранлăхра кĕтӳ çӳрет, —
Кĕрхи сĕтсем çăра хăймаллă.
Кăнтăралла хуркайăксем
Карти-картипеле куçаççĕ;
Кĕрхи хĕвел çинче вĕсем
Ылтăн çунатлă курăнаççĕ.
Ылтăнланан вăрман тăрне
Пилеш вĕри кăвар сапать-мĕн.
Кам савмĕ-ха кĕр мăнтăрне,
Кама ун ырлăхĕ йăпатмĕ?
Вăрманалла шала кĕрсен,
Юмахри пек туятăн эсĕ:
Сап-сарă ылтăн мăйăрсем
Тӳрех сан ывçуна ӳкеççĕ.
Йăлтах манатăн хăвна ху,
Çăкалăхпа пыратăн çулсăр.
Савни хыпарĕ мар-ши ку —
Вĕл-вĕл вĕçен çак ылтăн çулçă?
Мĕн каласа мĕн çырнă-ши?
Çăка çулçи чăнах çыруллă.
Тăван кĕтес, тăван çĕршыв,
Çак ылтăн тум сана ятуллă.
Сенкер куç евĕр кӳлĕсем
Тĕнче çине пăхаççĕ ыррăн,
Тăван çĕр тăрăх утнăçем
Ăçтан-ха юрламасăр пырăн?
Анне мана пĕр лăпкă ир
Çак уçă ирĕкре çуратнă.
Ытарайми тăван уй-хир,
Епле сана чунтан юратмăн?
Ӳссен — ыр кăмăлпа анчах
Эпир хире ыр вăрлăх акнă;
Кашни калча, кашни пучах
Кунта мана темрен те хаклă.
...Хирти ĕçсем кăштах пĕтмен,
Шăвать ав трактор пусă урлă.
Вăл сухалать кĕрхи çĕртме —
Килес çул пултăр ылтăн тулă.
Кăçалхине каçкӳлĕмпе
Колхоз ĕнер çапса пуçтарчĕ.
Çĕршывăн аслă пӳлмине
Чи хаклă ылтăн-çке тултарчĕ.
Кĕрхи кунсем, кĕрхи сăнсем, —
Хăйсене май вĕсен хавасĕ.
Çулла çураçнă сар хĕрсем
Кĕркуннепе качча каяççĕ.
Ан тив, туй сиктĕр ир те каç,
Юнра кĕр мăнтăрĕ вылятăр!
Кĕрте шапа çеç юрламасть, —
Шурлăхĕнчех, ан тив, вăл лартăр.
Çӳл тӳперен хуркайăксем
Салам ярса çунат сулаççĕ.
Хăйсен чĕлхипеле вĕсем
Чипер кунçул пире сунаççĕ.
Эп вĕсене ăсатнă май,
Ăмсаннипе чунтан çунатăп:
Çапла инçе çула тухма
Пулсанччĕ манăн та çунатăм!
Ан тив, ытах шухăшăмпа
Вĕçсе каям çĕршывăм çийĕн.
Курам: епле ылтăн тумпа
Капăрланать тăван Россия.
Çитем-и эп Казахстана,
Çитсе курам-и Алтая та...
Паян эп пĕтĕм тăвана
Пур паттăр ĕçшĕн пуç таятăп.
Украинран та Çĕпĕртен
Тиевлĕ пуйăссем шăваççĕ.
Тăван çĕршывăм, хĕпĕрте,
Ывăлусем парне яраççĕ.
Мĕнпур енчен Мускавалла
Тапать пĕр юхăм — ылтăн тулă.
Çĕршыв пӳлмийĕ пулмалла
Кăçал нихçанхинчен те тулăх.
Çапла çĕршыв кĕрекине
Пит вашаватлă, тараватлă
Кĕрет кĕрнеклĕ кĕркунне
Кĕре те хӳхĕм сăн-сăпатлă.