Сап-сарă çулçă — çут тĕнчен пĕр пайĕ
Вĕлтĕртетсе, хуллен çĕре ӳкет:
Сар çулçăпа йăлт витĕннĕ шур хурăн айĕ,
Тек ан тăк çулçуна, шур хурăнăм, çитет.
Çук, итлемест ман сăмаха çак йывăç,
Тăкать-тăкать вăл çулçине çĕре.
Эп пуçтарап ун çулçине пĕр ывăç,
Тем пăлханса тапать паян чĕре.
Каласшăн вăл мана: «Кĕрхи çанталăк
Хăй йĕркине тытса пырать çапла,
Сар çулçăран хăйне лартать вăл палăк,
Шап-шур хĕле кĕтсе илет çапла.
Эс ан палхан, часах вĕçсе килеççĕ
Çуркуннене лартса шур акăшсем.
Ун чух каллех тавралăха витеççĕ
Сип-симĕс илемпе çĕн çулçăсем...»
03.09.2007.