Чинавье инке паян та ман умра
Пĕçерет пекех вĕри икерчĕ.
Çеменпе Калля пичче ялан асра,
Чапайпа Тутимĕрĕн хăвачĕ…
Çĕр ĕçченĕ — вашават, маттур Кĕлпук
Кӳршĕри Миккуль тете пекех-çке!
Манăçми поэт çуратнă эс, Слакпуç!
Калама сăмахăм та çитмест-çке!
Мĕн кăна поэт тӳсмен-ши пурнăçра?
Выçлăхри кунсем йӳç эрĕм пулнă.
Пăшалпа çӳренĕ аслă вăрçăра,
Атă кунчинче хутсем упранă…
Сан тăван çĕрне çитсеччĕ эп, Ухсай!
Шăпама халь уншăн тав тăватăп.
Кĕслету пăлхатĕ чунăма нумай…
Талантна ялан сума сăватăп.