Çурхи ăшă çумăр
Ир-ирех ташларĕ,
Сар хĕвел те кулчĕ
Хыççăнах вăл кун.
Çак куна курмашкăн
Çĕр çине васкарĕ,
Амăшне сас пачĕ
Пĕчĕк чĕрĕ чун.
Пĕчĕкçĕ пепкеçĕм
Çав тери чечен-çке,
Тĕлĕнсе пăхать вăл
Çут тĕнче çине.
Эп те тĕлĕнетĕп —
Тин кăна пĕчченччĕ,
Паянтан ак пултăм
Çĕнĕ çын — АННЕ.
Ӳс часрах патвар эс,
Пул ялан телейлĕ,
Аçупа аннӳшĕн
Савăнăç пулса.
Пурнăçра, тен, пулĕ
Çумăр та, хĕвел те,
Кай мала, пепкеçĕм,
Çирĕппĕн утса.