Шанмасăр ан кĕлту Турра,
ан ыйт нимскер те — ĕненмесĕр.
Суятăн, юратмастăн эсĕ,
эс ăшунта кулан унран.
Пуш çын эс — чунсăр та чĕресĕр.
Чунра çиçмест тĕк юрату,
Турра тупаймăн çынсем урлă.
Малтан çынсем патне çул туп,
чун уç, юрат та ырă ту,
вара, тен, курнĕ çулĕ Туррăн.
Тен, курăнмĕ... Юратăвна
çĕрти ĕçсем-пуçсем хупларĕç.
Çĕрти — çителĕксĕр. Ăна
çак пурнăç тулашне кăлар эс,
вара... кĕлту. Ыр çул сана!