Çĕн хыпар, ялпа паллашнăн,
Черетлерĕ пур киле:
Сăрапа-мĕн сыв пуллашнă
Куштан чунлă Пурхиле.
Пурнăç лăпкă, пурнăç мирлĕ —
Вăр-хурах таврашĕ çук.
Мăн çăра мĕне-ха кирлĕ
Çĕнĕ пурнăç тунă чух?
— Пурхиле-и? Хыт кукар-и? —
Тет юлташăм йăл кулса. —
Анăçран хĕвел хăпарĕ
Ку хыпар чăнах пулсан!
— Тĕрĕсех пуль, — тетĕп эпĕ, —
Чĕлхӳне кăштах чарсам...
Пĕр ирпе пырса кĕретĕп
Пурхиле килне эп хам.
Чечек евĕр шанчĕ шанчăк
Çук пулин те мăн çăра:
Алăк умĕнчи шур анчăк
Карăнтарчĕ сăнчăра.