Кам çул çӳренĕ, çав пĕлет:
Эс, сăмахран, кĕтетĕн пуйăс.
Кĕçех сутаççĕ-ши билет?
Çĕр хут та ĕнтĕ ыйтрăн пуль эс.
Пĕр вырăнта лара-тăра
Эс тунсăхлатăн хытăрах.
Утса çӳрес — зал пушă мар,
Табак туртас — çын юнашар.
Çумри сăпайлă сар инкен
Чăрмавĕ хăйĕн пур иккен:
Чĕрçи çинче — утман ача,
Йĕме вăл чарăнмасть пачах.
...Вăрнар ваксалĕ. Çурçĕр тĕлĕ.
Хĕрсем шавлаççĕ паçăрах.
Ача сасси çинçе хăй тĕллĕн,
Пур сасăран вăл уçăрах.
Тапса сирет çивиттине,
Вăл урайне анасшăн,
Ура çине тăрасшăн.
Ак кур — çырлахрĕ вăл тинех,
Кĕлеткине хытарчĕ тӳрĕ,
Ман еннелле пĕр утăм турĕ.
Унтан тепре. Унтан татах.
Алри кĕнекене куçларĕ,
Хуллен çывхарчĕ ман пата...
Пĕчĕк чăваш ута пуçларĕ!
Миçе ал тăсăлчĕ ачашшăн?
Пур çын та хĕпĕртет ачашăн.
Чĕрем тулли салам екки.
Ача куçланă кĕнеке
Парнелĕх пултăр-и, инке, —
Вăл аслă Ленин кĕнеки.
...Вун икĕ хут Мускав сехечĕ
Çапать те — гимн ян каять.
Чăваш ачи утма вĕренчĕ
Тесе чыс тунăн туйăнать.