Уй-хирте — çилсен ташши...
Сăрт çинче — çилсен ташши...
Хулан çут урамĕнче те —
Çил ташши...
Шыв çинче те, тӳпере те,
Сан хăлхун алки çинче те,
Тĕм-хура çӳçӳ çинче те —
Çил ташши, çил ташши, çил ташши
çавраçиллĕ çил ташши!..
Кам калать-ши кĕввине —
чăрсăр ташă кĕввине?
Вăйăçи ытла маттур —
камăн-ши гитара пур?
Сĕртĕнет хĕлĕхсене
питĕ ерипен
е пусать чĕлĕхсене
ерипен.
Сĕртĕнет хĕлĕхсене
питĕ васкаса
е пусать чĕлĕхсене
вăрăнса.
Кĕввине те çил калать,
çилсене вăл йыхăрать.
Тĕрлĕ тĕслĕ кĕвĕ майăн
вирхĕнсе
тухрĕç питĕ те нумаййăн
ташлама каçхи çилсем.
Ăшăнасшăн хăшĕсем —
аллисем лекеççĕ пăр пек.
Чуптăваççĕ хăшĕсем —
ыталаççĕ çепĕç хĕр пек.
Тăвăллăн янрать оркестр,
тĕлĕнтермĕшле оркестр,
халиччен курман оркестр —
чим, ăçтан-ши ку оркестр?
Пурте паллă — пурте çыннăн.
Çилсенчен çил хыврĕ юрă.
Курăнаççĕ пианинăн
шăлĕсем хура та шурă:
çилĕн чăрсăр ташшинчен
вăл кулать ахăлтатса.
Вăл хăйне шанса, пĕччен,
тăвăллă сассем тупса,
çилĕн шухă ташшине
васкатать çине-çине.
Е çинçен, çинçен, çинçен —
чӳхенсе — çинçен, çинçен,
чĕтренсе — çинçен, çинçен,
ун сасси каять инçе.
Дирижер та пур кунта:
аллипе пĕрмай сулкалĕ.
Дирижер та пур кунта:
музыка вăйне тытать
ун таланчĕпе вăй-халĕ.
Ырханкка сăн-питĕнче,
кăмрăк пек хура куçсен,
йăлтăркка, хура куçсен
сулхăн, сивĕ çутинче
çил ташши вăйне куран,
ташă ритмне тытан.
Дирижер та пур кунта:
лӳчĕркенчĕк тĕксĕм тумĕ
варкăшса тăрать таçтан
çапăнсасоăн ташă хумĕ.
Çак именчĕк дирижерăн
вăйлă, вăрăм пӳрнисем —
пиçĕ, çирĕп туратсем.
Çак именчĕк дирижерăн
ывăнмаççĕ аллисем.
Кăмрăк пек ун куçĕсем —
ман куçсем — ун куçĕсем!
Çил ташши, çил ташши, çил ташши,
çавраçиллĕ çил ташши —
камшăн ташă ытлашши?
Пĕр тĕлте, хăмăшлăхра,
тунсăх пуснă çил йĕрет.
Пĕр тĕлте, хăмăшлăхра,
хуйхă пуснă çил йĕрет.
Кукленсе ларса йĕрет
е вырта-вырта йĕрет,
татăлсах иккен йĕрет.
Çил ташши, çил ташши, çил ташши,
çавраçиллĕ çил ташши —
камшăн ташă ытлашши?
Пĕр тĕлте, хăмăшлăхра,
чăштăркка хăмăшлăхра
тунсăх пуснă çил йĕрет,
хуйхă пуснă çил вĕрет,
татăлсах иккен йĕрет...