Ҫӗршыв Президенчӗ Владимир Путин пӗлтӗрхи ҫулла ятарлӑ саккуна алӑ пуснӑ хыҫҫӑнах Чӑваш Енӗн Наци телекуравӗ 21-мӗш кнопкӑна хӑҫан та пулин йышӑнӗ-ши тесе шухӑшлама тытӑннӑччӗ.

Ӗҫлӗ хутӑн ячӗ урӑхларах-ха. Ӑна МИХсем ӑна кӗскетсе ҫапла ят панӑ. Саккуна РФ Патшалӑх Думи ырланӑ, ҫӗршыв Президенчӗ алӑ пуснӑ вӑхӑтра парламентӑн «Республика» хаҫатӗнче ӗҫлеттӗм те пирӗн тӑрӑхра 21-мӗш канал хӑҫан ӗҫлесе кайӗ-ши тесе ЧР Информаци политикипе массӑллӑ коммуникацисен министерствине ыйту та ҫырнӑччӗ. Унта 21-мӗш кнопка ыйтӑвӗпе ӗҫленине пӗлтернӗччӗ. Халӗ вара ҫав сӑмах чӑна килни паллӑ.

Роскомнадзорӑн республикӑри управленийӗн сайтӗнче хыпарланӑ тӑрӑх, 21-мӗш кнопкӑна лекессишӗн пирӗн республикӑра НТРК тата «Телеканл 21+» конкурса хутшӑнӗҫ. Республикӑра ытти телеканал та пур. Анчах конкурс условийӗ федераци саккунӗпе килӗшсе тӑмалла. Унта вара 21-мӗш кнопкӑна лекме ӑнтӑлакан телеканалӑн хӑйӗн контенчӗ 75 процентран кая мар пулмаллине каланӑ тата унӑн регионта пурӑнакансенчен 50 процентӗнчен кая мар патне ҫитмелле.

Конкурс нарӑсӑн 22-мӗшӗнче иртмелле. Икӗ мультиплекс хыҫҫӑнхи кнопкӑна кам йышӑнасси паллӑ пулӗ.

Сӑмах май ҫакна та палӑртмалла: маларах ЧР Информаци политикипе массӑллӑ коммуникацисен министерстви НТРКна спутникпа кӑтартма пуҫлассине хыпарланӑччӗ. Ӑна кӑҫалхи пуш уйӑхӗн 1-мӗшӗнчен ӗҫлеттерсе ямаллине каланӑччӗ. Контрактӑн пуҫламӑш хакӗ 20,8 миллион тенкӗ тесе пӗлтернӗччӗ. Ҫак «кӗмӗл» телекуравпа радиона спутник урлӑ пуш—раштав уйӑхӗсенче кӑтартма ҫитмелле.